670 మిలియన్ కిలోమీటర్ల దూరం నుంచి.. మన సూర్యుడి దగ్గరకు వస్తున్న ఈ వింత వస్తువేంటి?
ఈ అనంత విశ్వంలో మనకు తెలియని ఎన్నో అద్భుతాలు ఇంకా ఎన్నో ఉన్నాయని ఈ "3I/ATLAS" గుర్తుచేస్తోంది.
- Published By: 10TV Digital Team ,Published On : July 3, 2025 / 09:15 PM IST
మన సౌర కుటుంబంలోకి ఎక్కడి నుంచో, ఏ నక్షత్ర మండలం నుంచో గుర్తు తెలియని అతిథి ప్రవేశిస్తోంది. ఇది గ్రహం కాదు, గ్రహశకలం కాదు. ఇది నక్షత్రాల మధ్య, సుదూర ప్రాంతం నుంచి మన సూర్యుడి వైపు ప్రయాణిస్తున్న ఒక అరుదైన ఇంటర్‌స్టెల్లర్ కామెట్ (Interstellar Comet). శాస్త్రవేత్తలు దీనిని గుర్తించి, ఇప్పుడు దాని రహస్యాలను ఛేదించే ప్రయత్నంలో ఉన్నారు.
ఈ అపరిచిత వస్తువుకు శాస్త్రవేత్తలు “3I/ATLAS” అని తాత్కాలికంగా పేరు పెట్టారు. జూలై 1న, చిలీలోని ATLAS టెలిస్కోప్ (NASA నిధులతో పనిచేసే వ్యవస్థ) దీనిని మొదటిసారిగా గుర్తించింది. ఇది సజిటేరియస్ నక్షత్ర సమూహ దిశ నుంచి మన సౌర కుటుంబంలోకి ప్రవేశిస్తున్నట్లు కనుగొన్నారు.
ఇది మన సూర్యుడి చుట్టూ తిరిగే వస్తువు కాదు. ఇది వేరే నక్షత్ర వ్యవస్థకు చెందినది. సుదూర విశ్వంలో ప్రయాణిస్తూ, అనుకోకుండా మన సౌర కుటుంబం వైపు వస్తోంది. ఇప్పటివరకు మన సౌర కుటుంబానికి బయట నుంచి వచ్చినట్లు గుర్తించిన మూడవ వస్తువు ఇది. గతంలో రెండు ఇలా వచ్చాయి. వాటిలో మొదటిది ‘ఓమువామువా’, రెండవది ‘బోరిసోవ్’.
మనకు ఏమైనా ప్రమాదం ఉందా?
ఈ తోకచుక్క వల్ల భూమికి ఎలాంటి ముప్పు లేదు. ఇది భూమికి అత్యంత సమీపంగా వచ్చినప్పుడు కూడా, సుమారు 150 మిలియన్ మైళ్ల (240 మిలియన్ కిలోమీటర్లు) దూరంలోనే ప్రయాణిస్తుంది. ఇది దాదాపు భూమికి, సూర్యుడికి మధ్య ఉన్న దూరం కంటే ఎక్కువ. కాబట్టి మనం ఎలాంటి ఆందోళన చెందాల్సిన అవసరం లేదు.
ఈ వింత వస్తువును ఎప్పుడు చూడొచ్చు?
ప్రస్తుతం భూమికి 670 మిలియన్ కిలోమీటర్ల దూరంలో ఉన్న ఈ తోకచుక్క.. క్రమంగా మన సూర్యుడి వైపు దూసుకొస్తోంది. అక్టోబర్ 30న ఇది సూర్యుడికి అత్యంత సమీపంగా (అంగారక గ్రహ కక్ష్య లోపలికి) చేరుకుంటుంది. సాధారణ ప్రజలు దీన్ని చూడలేకపోయినా, శక్తిమంతమైన టెలిస్కోపుల ద్వారా శాస్త్రవేత్తలు దీనిని చూస్తారు. ఆ తర్వాత సూర్యుడి ప్రకాశం వల్ల ఇది కనిపించకుండా పోతుంది.
సూర్యుడిని దాటిన తర్వాత, డిసెంబర్ నెలలో ఇది తిరిగి కనిపించే అవకాశం ఉందని శాస్త్రవేత్తలు ఆశిస్తున్నారు. అప్పుడు దీని నిర్మాణం, వేగం, అది ఏ పదార్థాలతో తయారైందో మరింత లోతుగా అధ్యయనం చేయవచ్చు.
పాత డేటాను (జూన్ 14 నాటి చిత్రాలను) పరిశీలించడం ద్వారా, శాస్త్రవేత్తలు దీని ప్రయాణ మార్గాన్ని మరింత కచ్చితంగా అంచనా వేస్తున్నారు. ఇది ఏ నక్షత్ర వ్యవస్థ నుంచి వచ్చింది? దాని పుట్టుక ఎలా జరిగింది? మన సౌర కుటుంబానికి, దానికి మధ్య తేడాలు ఏమిటి? ఇలాంటి ప్రశ్నలకు సమాధానాలు కనుగొనడం ద్వారా, విశ్వం పుట్టుక, ఇతర నక్షత్ర మండలాల గురించి మన అవగాహన మరింత పెరిగే అవకాశం ఉంది. ఈ అనంత విశ్వంలో మనకు తెలియని ఎన్నో అద్భుతాలు ఇంకా ఎన్నో ఉన్నాయని ఈ “3I/ATLAS” గుర్తుచేస్తోంది.
