బెట్టింగ్ పిచ్చి : జైళ్లో కోళ్లు, అష్టకష్టాలు పడుతున్నాయి

Hens Arrested : కోళ్లు కటకటాల పాలయ్యాయి.. అవును మీరు విన్నది నిజమే.. కోళ్లు పోలీస్‌స్టేషన్‌లో బందీగా మారాయి. పందెంరాయుళ్ల వల్ల ఆరుబయట తిరగాల్సిన మూగజీవాలు బందీ ఖానాలో బిక్కుబిక్కుమంటున్నాయి. సంక్రాంతి అయిపోయి నెల కావస్తున్నా.. పందేల మోజు తీరని బెట్టింగ్‌ గాళ్ల వల్ల పోలీస్‌స్టేషన్‌ పాలై అష్టకష్టాలు పడుతున్నాయి. ఖమ్మం జిల్లా ముదిగొండ మండలం బాణాపురంలో కొందరు యువకులు, ఆంధ్ర ప్రాంతానికి చెందిన వ్యక్తులతో కలిసి కోడి పందాలు వేస్తున్నారు. సంక్రాంతి అయిపోయినప్పటికీ అప్పుడప్పుడు ఇలా పందేలు జరుగుతూనే ఉన్నాయి.

ఈ విషయం తెలుసుకున్న పోలీసులు.. ఆకస్మికంగా దాడులు చేశారు. పందేలు వేస్తున్న యువకులతో పాటు నగదును, రెండు కోళ్లను అదుపులోకి తీసుకున్నారు. అయితే కోళ్లను పోలీస్‌స్టేషన్‌లోకి లాకప్‌లో పెట్టడం ఇప్పుడు చర్చనీయాంశంగా మారింది. 20 రోజుల క్రితం వాటిని సెల్లో బంధించారు పోలీసులు. అప్పటి నుంచి వాటికి ఆహారం, నీరు పోలీస్‌ సిబ్బందే అందిస్తున్నారు. అయితే నిబంధనల ప్రకారం వాటిని సెల్‌లో ఉంచమని.. కానీ కోర్టు ఆదేశాలు వచ్చే వరకు వాటిని సంరక్షించాల్సిన బాధ్యత తమదే కాబట్టి తప్పలేదంటున్నారు పోలీసులు. ఇలా పందెం రాయుళ్ల బెట్టింగ్‌ పిచ్చికి.. ఏ పాపం తెలియని కోడి పుంజులు ఊచలు లెక్కిస్తున్నాయి.