KTR: ఎమ్మెల్యే కౌశిక్ రెడ్డి అరెస్ట్‌పై కేటీఆర్ కీలక కామెంట్స్.. సీఎం రేవంత్ రెడ్డిపై ఫైర్
కేటీఆర్ లండన్ పర్యటనలో ఉన్నారు. ఎమ్మెల్యే పాడి కౌశిక్ రెడ్డి అరెస్టు విషయం తెలుసుకున్న కేటీఆర్.. అరెస్టును తీవ్రంగా ఖండించారు.
- Published By: 10TV Digital Team ,Published On : June 21, 2025 / 10:34 AM IST
KTR reaction on MLA Kaushik Reddy arrest
KTR: బీఆర్ఎస్ ఎమ్మెల్యే పాడి కౌశిక్ రెడ్డిని వరంగల్ సుబెదారి పోలీసులు శంషాబాద్ విమానాశ్రయంలో అరెస్టు చేశారు. అరెస్టు సందర్భంగా కౌశిక్ రెడ్డి మాట్లాడుతూ.. అక్రమ మైనింగ్ చేస్తూ ప్రజలను ఇబ్బంది పెడుతున్నారని ప్రశ్నిస్తే సీఎం రేవంత్ రెడ్డి, మంత్రి సీతక్క నామీద అక్రమ కేసులు బనాయిస్తున్నారని, కేసులకు భయపడే వాడినికాదు.. ఎన్ని కేసులు పెట్టిన ప్రజల కోసం పోరాడుతూనే ఉంటానని కౌశిక్ రెడ్డి అన్నారు. అయితే.. కౌశిక్ రెడ్డి అరెస్టు పై బీఆర్ఎస్ వర్కింగ్ ప్రెసిడెంట్ కేటీఆర్ స్పందించారు. ఈ సందర్భంగా సీఎం రేవంత్ రెడ్డి, కాంగ్రెస్ ప్రభుత్వంపై తీవ్ర స్థాయిలో వ్యాఖ్యలు చేశారు.
Also Read: ఓరుగల్లు గడ్డ తమ అడ్డా అంటున్న కొండా దంపతులు.. మొదటి నుంచి ఇప్పటివరకు ఏం జరిగింది?
కేటీఆర్ లండన్ పర్యటనలో ఉన్నారు. ఎమ్మెల్యే పాడి కౌశిక్ రెడ్డి అరెస్టు విషయం తెలుసుకున్న కేటీఆర్.. అరెస్టును తీవ్రంగా ఖండించారు. సోషల్ మీడియా ద్వారా కౌశిక్ రెడ్డి అరెస్టుపై కేటీఆర్ స్పందించారు. శంషాబాద్ విమానాశ్రయంలో హుజురాబాద్ ఎమ్మెల్యే కౌశిక్ రెడ్డిని అక్రమంగా అరెస్టు చేయడం అత్యంత దుర్మార్గమైన చర్య. సీఎం రేవంత్ నిరంకుశ వైఖరిని తీవ్రంగా ఖండిస్తున్నానని అన్నారు.
ముఖ్యమంత్రి అక్రమాలను, మంత్రుల అవినీతిని, కాంగ్రెస్ నేతల దుర్మార్గాలను అడుగడుగునా కౌశిక్ రెడ్డి ప్రశ్నిస్తున్నారు కాబట్టే ఆయనపై కక్షకట్టి అక్రమ కేసులు బనాయిస్తున్నారని కేటీఆర్ ఆగ్రహం వ్యక్తం చేశారు. గత ఏడాదిన్నరకాలంగా కాంగ్రెస్ సర్కార్ ప్రజలకు చేస్తున్న అన్యాయాలపై నిలదీస్తున్న కౌశిక్ రెడ్డిని తప్పుడు కేసులతో ఇబ్బందిపెట్టే కుట్ర అనేక నెలల నుంచి కొనసాగుతూనే ఉందని అన్నారు. ఇలాంటి చిల్లర చేష్టలు, పనికిరాని కేసులు బీఆర్ఎస్ నేతల సంకల్పాన్ని, మనోధైర్యాన్ని ఎప్పటికీ దెబ్బతీయలేవని కేటీఆర్ పేర్కొన్నారు.
ఇందిరమ్మ రాజ్యమని చెప్పుకునే రేవంత్ ఎమర్జెన్సీని తలపించేలా ప్రశ్నించే గొంతులపై అణచివేత చర్యలతో ప్రజాక్షేత్రంలో అబాసపాలవుతున్నాడు. కాంగ్రెస్ ఇచ్చిన హామీలను అమలు చేయలేని తన చేతకానితనాన్ని కప్పిపుచ్చుకునేందుకే రేవంత్ ప్రజల దృష్టిని మళ్లించేందుకు ఇలాంటి దారుణాలకు పాల్పడుతున్నాడు. అసమర్ధ ముఖ్యమంత్రి ఆదేశాలతో అరెస్టు చేసిన ఎమ్మెల్యే కౌశిక్ రెడ్డిని వెంటనే బేషరతుగా విడుదల చేయాలి. మాకు గౌరవ న్యాయస్థానాలపై సంపూర్ణ నమ్మకం ఉంది. మాపై, మా నేతలపై ఎన్ని అక్రమ కేసులు పెట్టినా అవి కోర్టులో నిలబడే అవకాశమే లేదు. ఎన్ని వందల తప్పుడు కేసులు పెట్టినా రేవంత్ నియంత పాలనపై, బీఆర్ఎస్ ప్రజల పక్షాన పోరాడుతూనే ఉంటుంది.
