తెలంగాణకు బిగ్ వెదర్ అలర్ట్.. రెండు రోజులు ఆరెంజ్ అలర్ట్.. ఆ తర్వాత రెండు రోజులు..
హైదరాబాద్‌లో కూడా భారీ వాన పడింది.
- Published By: 10TV Digital Team ,Published On : May 28, 2025 / 07:45 AM IST
Rains
తెలంగాణలో భారీ వర్షాలు కురుస్తున్నాయి. ఇవాళ, రేపు ఆరెంజ్ అలర్ట్, ఆ తదుపరి రెండు రోజులకు ఎల్లో అలర్ట్ను జారీ చేసింది భారత వాతావరణ శాఖ (ఐఎండీ). తెలంగాణలో ఈ నాలుగు రోజులు వర్షాలు కురుస్తాయని చెప్పింది.
ఇటీవలే ప్రవేశించిన రుతుపవనాల చురుగ్గా కదులుతున్నాయని ఐఎండీ పేర్కొంది. నిన్న మహబూబ్నగర్ జిల్లా వరకు విస్తరించాయని చెప్పింది. పశ్చిమ మధ్య బంగాళాఖాతంలో అల్ప పీడనం ఏర్పడిందని, దీని ప్రభావం తెలంగాణపై అంతగా ఉండదని తెలిపింది.
తెలంగాణలో ఇవాళ, రేపు అతి భారీ వర్షాలు కురుస్తాయని, ఆ తదుపరి రెండు రోజులు ఓ మోస్తరు నుంచి భారీ వర్షాలు కురుస్తాయని వివరించింది. హైదరాబాద్ సహా తెలంగాణలోని అనేక జిల్లాల్లో గంటకు 50 – 60 కి.మీ వేగంతో ఈదురుగాలులు వీస్తాయని చెప్పింది. తెలంగాణ వ్యాప్తంగా ఉష్ణోగ్రతలు 5 – 7 డిగ్రీలు తగ్గే ఛాన్స్ ఉందని తెలిపింది.
తెలంగాణలో ఈ సారి సాధారణం కంటే అధిక వర్షపాతం నమోదయ్యే అవకాశాలు ఉన్నట్లు చెప్పింది. కాగా, నిన్న తెలంగాణలోని కరీంనగర్ జిల్లా ఖాసింపేటలో అత్యధికంగా11.4 సె.మీ వర్షపాతం నమోదైంది. నిన్న హైదరాబాద్‌లో కూడా భారీ వాన పడింది. గత రాత్రి 7 గంటల నుంచి రాత్రి 9 గంటలవరకు వర్షం పడింది.
సికింద్రాబాద్, అత్యధికంగా రామచంద్రాపురంలో 5.5 సె.మీ. వర్షపాతం నమోదైంది. హైదరాబాద్‌లోని సూరారం కాలనీలో పద్మారావు అనే వ్యక్తి ఇంట్లోకి భారీగా వరద నీరు చేరింది. పద్మారావు ఆ సమయంలో బాగా మద్యం తాగి ఉండడంతో నీళ్లలోనే మునిగి చనిపోయాడు.
