బెహన్ జీ పిలుపు : పవన్ కు ఒక్క ఛాన్స్ ఇవ్వండి

ఒకే ఒక్క ఛాన్స్ ఇవ్వండి.. ఈ డైలాగ్ నేతలు విపరీతంగా వాడేస్తున్నారు. ఎన్నికలు వచ్చాయంటే రొటీన్ వార్డ్. ఇప్పుడు ఇదే రకంగా పిలుపునిచ్చారు యూపీ మాజీ సీఎం, బీఎస్పీ అధినేత మాయావతి. పవన్ కల్యాణ్ పార్టీ జనసేనతో పొత్తు పెట్టుకుని.. విశాఖపట్నం ప్రచారానికి వచ్చారు. పనిలో పనిగా విలేకరులతో ముచ్చటించారు. ఏపీలో పరిపాలన, ప్రతిపక్షాల గురించి విమర్శించారు. పొత్తులో భాగంగా జనసేన పార్టీ విధానాలు, పవన్ కల్యాణ్ సిద్ధాంతాలను కీర్తించారు. ఒకే ఒక్క ఛాన్స్.. పవన్ కల్యాణ్ కు ఇస్తే.. మార్పు ఏంటో చూపిస్తాడని భరోసా ఇచ్చారు. 

టీడీపీ, వైఎస్ఆర్ కాంగ్రెస్ పార్టీలను నమ్మొద్దని సూచించారు. ఉమ్మడి ఏపీని కాంగ్రెస్ అభివృద్ధి చేయలేదన్న విషయాన్ని గుర్తు చేశారు. విభజన తర్వాత ఏపీకి అన్యాయం జరిగిందని.. ప్రత్యేక హోదాపై బీజేపీ మోసం చేసిందంటూ ఆవేదన వ్యక్తం చేశారామె. ఏపీ ప్రజలు చంద్రబాబు, జగన్ వలలో పడొద్దని పిలుపునిచ్చారు. ప్రజలు కొత్త నాయకత్వాన్ని ఆదరించాలని కోరారు మాయావతి.

ఏపీలో జనసేన, బీఎస్పీ, వామపక్షాలు కలిసి పనిచేస్తున్నాయని.. అన్ని పార్టీ కార్యకర్తలు, నేతల సమన్వయంతో ముందుకు వెళ్లాలని సూచించారు. జనసేన, బీఎస్పీ పార్టీలు తక్కువ చెప్పి.. ఎక్కువ పనులు చేస్తాయన్నారు. సమాజంలోని ప్రతి సమస్యను పరిష్కరించేందుకు పని చేస్తామని హామీ ఇచ్చారామె. పవన్ కళ్యాణ్ కు యూత్ ఫాలోయింగ్ చాలా బాగుందని.. పవన్ కూటమిదే విజయమని ధీమా వ్యక్తం చేశారామె. పవన్ సీఎం అవుతారని విశ్వాసం ఉందంటూ జోస్యం చెప్పారు మాయావతి.