Delhi: మహిళను ఢీకొని 12 కిలోమీటర్లు లాక్కెళ్లిన కారు.. మహిళ మృతి
ఆదివారం అర్ధరాత్రి 03.00 గంటల సమయంలో ఢిల్లీ సుల్తాన్‌పురి ప్రాంతంలో అంజలి స్కూటీపై వెళ్తుండగా ఒక కారు ఢీకొంది. ఈ ఘటనలో ఆమె కారు చక్రంలో ఇరుక్కుంది. అయినప్పటికీ ఆ కారును ఆపకుండా అందులోని వ్యక్తులు అలాగే లాక్కెళ్లారు.
- Published By: 10TV Digital Team ,Published On : January 2, 2023 / 10:34 AM IST
Delhi: దేశ రాజధాని ఢిల్లీలో దారుణం జరిగింది. ఆదివారం అర్ధరాత్రి ఒక మహిళను ఢీకొన్న కారు ఆమెను 12 కిలోమీటర్లు లాక్కెళ్లింది. ఈ ఘటనలో ఆమె అక్కడికక్కడే మరణించింది. పోలీసులు తెలిపిన వివరాల ప్రకారం.. ఢిల్లీ, అమన్ విహార్ ప్రాంతానికి చెందిన అంజలి అనే మహిళ తన కుటుంబంతో కలిసి ఉంటోంది.
ఈ క్రమంలో శనివారం సాయంత్రం ఇంటి నుంచి స్కూటీపై బయటకు వెళ్లింది. రాత్రి పది గంటలకల్లా తిరిగొస్తానని చెప్పింది. ఆ కుటుంబానికి ఆమే జీవనాధారం. అయితే, ఆదివారం అర్ధరాత్రి 03.00 గంటల సమయంలో ఢిల్లీ సుల్తాన్‌పురి ప్రాంతంలో అంజలి స్కూటీపై వెళ్తుండగా ఒక కారు ఢీకొంది. ఈ ఘటనలో ఆమె కారు చక్రంలో ఇరుక్కుంది. అయినప్పటికీ ఆ కారును ఆపకుండా అందులోని వ్యక్తులు అలాగే లాక్కెళ్లారు. అలా ఆమెను 12 కిలోమీటర్లు లాక్కెళ్లారు. ఈ ఘటనలో ఆమె అక్కడికక్కడే ప్రాణాలు కోల్పోయింది. అయితే, కారు ఆ మహిళను లాక్కెళ్లడం స్థానికులు చూసి అర్ధరాత్రి 03.24 నిమిషాలకు పోలీసులకు ఫోన్ చేశారు. అనంతరం ఉదయం నాలుగు గంటల సమయంలో మహిళ మృతదేహం రోడ్డు పక్కన పడి ఉందని మరికొందరు పోలీసులకు సమాచారం అందించారు.
పోలీసులు ఘటనా స్థలానికి చేరుకుని, మృతదేహాన్ని స్వాధీనం చేసుకున్నారు. ఘటనపై విచారణ జరిపిన పోలీసులు ఐదుగురు నిందితుల్ని అరెస్టు చేశారు. కాగా, ఈ ఘటనపై మృతురాలి తల్లిదండ్రులు అనుమానం వ్యక్తం చేస్తున్నారు. ఆమెపై అత్యాచారం జరిగి ఉండొచ్చని అనుమానిస్తున్నారు. స్థానిక సోషల్ మీడియాలో కూడా దీనిపై ప్రచారం జరుగుతోంది. అయితే, ఇందులో నిజం లేదని పోలీసులు తెలిపారు. మృతురాలిపై అత్యాచారం జరగలేదని పోలీసులు అన్నారు.
