G-20 Summit: రష్యా అధ్యక్షుడు పుతిన్కు అరెస్ట్ భయం.. అందుకే ఇండియాకు రావట్లేదట.. ఐసీసీ ఎందుకు ఆయనను వెంబడిస్తోంది?
ఫిబ్రవరి 2022లో ఉక్రెయిన్‌పై రష్యా దాడి చేసింది. అనంతరం మార్చి 2023న పుతిన్‌పై అంతర్జాతీయ క్రిమినల్ కోర్టు వారెంట్ జారీ చేసింది. యుద్ధ సమయంలో ఉక్రెయిన్ నుంచి రష్యాకు అక్రమంగా పిల్లలను తీసుకెళ్లాడని రష్యా అధ్యక్షుడిపై ఆరోపణలు ఉన్నాయి
- Published By: 10TV Digital Team ,Published On : August 30, 2023 / 03:05 PM IST
Vladimir Putin: సెప్టెంబర్ 8 నుంచి 10వ తేదీ మధ్య మన దేశ రాజధాని ఢిల్లీలో జీ-20 సదస్సు జరగనుంది. ఈ సదస్సులో వివిధ దేశాల నేతలు భారత్‌కు చేరుకోనున్నారు. సమ్మిట్‌కు సన్నాహాలు కూడా చివరి దశలో ఉన్నాయి. సమ్మిట్‌కు హాజరయ్యే నేతలకు ఆతిథ్యం ఇవ్వడానికి దేశం ఎదురుచూస్తోంది. అయితే, ఈ సదస్సుకు రష్యా అధ్యక్షుడు వ్లాదిమిర్ పుతిన్ హాజరు కావడం లేదని వార్తలు వస్తున్నాయి. G-20 శిఖరాగ్ర సమావేశానికి కొద్ది రోజుల ముందు, ఆగస్టు 22 నుంచి ఆగస్టు 24 వరకు 5 దేశాల సమూహ ‘బ్రిక్స్’ సదస్సు దక్షిణాఫ్రికాలో జరిగింది. దీనికి కూడా పుతిన్ హాజరు కాలేదు.
Bro Movie : ఇండియాలోనే కాదు పాకిస్తాన్, బంగాళాదేశ్‌లో కూడా పవన్ కళ్యాణ్ బ్రో సందడి..
అయితే ఈ సదస్సులకు పుతిన్ ఎందుకు దూరంగా ఉంటున్నారనే చర్చ తీవ్రమవుతోంది. ఆయన ఐసీసీ(అంతర్జాతీయ క్రిమినల్ కోర్టు)లో సభ్యత్వం ఉన్న ఏ దేశానికీ వెళ్లడం లేదు. కారణం ఆయనపై ఐసీసీ అరెస్ట్ వారెంట్ జారీ చేసింది. నిజానికి, ఫిబ్రవరి 2022లో ఉక్రెయిన్‌పై రష్యా దాడి చేసింది. అనంతరం మార్చి 2023న పుతిన్‌పై అంతర్జాతీయ క్రిమినల్ కోర్టు వారెంట్ జారీ చేసింది. యుద్ధ సమయంలో ఉక్రెయిన్ నుంచి రష్యాకు అక్రమంగా పిల్లలను తీసుకెళ్లాడని రష్యా అధ్యక్షుడిపై ఆరోపణలు ఉన్నాయి. కానీ ఉక్రెయిన్, రష్యా రెండూ ఐసీసీలో సభ్య దేశాలు కావు. కాబట్టి ఈ నిబంధనలు ఈ దేశాలకు వర్తించవు.
ఇప్పుడు బ్రిక్స్ సదస్సుకు రష్యా అధ్యక్షుడు గైర్హాజరు కావడానికి ఈ సదస్సు నిర్వహించిన దేశం, అంటే దక్షిణాఫ్రికా ఐసీసీలో సభ్యదేశంగా ఉండడం ఒక కారణమని భావిస్తున్నారు. అటువంటి పరిస్థితిలో, ఐసీసీ తీసుకునే చర్యలను సభ్య దేశం అంగీకరించవలసి ఉంటుంది. పుతిన్ దక్షిణాఫ్రికాకు వెళ్లి ఉంటే, అక్కడ అరెస్టు చేసే అవకాశం లేకపోలేదు. అందుకే ఆయన బ్రిక్స్ సమావేశానికి హాజరు కాలేదని అంటున్నారు.
ఐసీసీ అంటే ఏమిటి?
ఐసీసీ అంటే ఇంటర్నేషనల్ క్రిమినల్ కోర్ట్. 1 జూలై 2002న ప్రారంభించారు. ఈ సంస్థ ప్రపంచవ్యాప్తంగా జరుగుతున్న యుద్ధ నేరాలు, మారణహోమం, మానవాళికి వ్యతిరేకంగా జరిగే నేరాలను పరిశోధిస్తుంది. ఈ సంస్థ 1998 రోమ్ ఒప్పందంపై రూపొందించిన నిబంధనల ఆధారంగా చర్య తీసుకుంటుంది. రోమ్ ఒప్పందం ప్రకారం బ్రిటన్, కెనడా, జపాన్ సహా 123 దేశాలు అంతర్జాతీయ క్రిమినల్ కోర్టులో సభ్యులుగా ఉన్నాయి.
ఐసీసీలో భారత్ కూడా సభ్యదేశమా?
ఐసీసీలో భారతదేశం సభ్య దేశం కాదు. అంటే ఐసీసీ జారీ చేసే ఎటువంటి నియమాలు, ఆదేశాలకు భారతదేశం కట్టుబడి ఉండదు. 2015లో సుడాన్ మాజీ అధ్యక్షుడు ఒమర్ హసన్ అల్ బషీర్ ఇండియా-ఆఫ్రికా ఫోరమ్ కోసం భారతదేశానికి వచ్చినప్పటి నుంచి దీనికి ఉదాహరణ తీసుకోవచ్చు. ఆయనపై ఐసీసీ వారెంట్ కూడా జారీ చేసింది. మీడియా నివేదికల ప్రకారం, ఆ సమయంలో అంతర్జాతీయ క్రిమినల్ కోర్ట్ ఆయన అరెస్టుకు భారతదేశం నుంచి సహకారం కోరింది. అయితే భారత్ అందుకు మద్దతు ఇవ్వలేదు.
జీ-20కి పుతిన్ ఎందుకు హాజరుకావడం లేదు?
ఇప్పుడు జీ-20 సదస్సులో పుతిన్ పాల్గొనడం లేదంటూ రష్యా నుంచి అధికారిక ప్రకటన వచ్చినా.. అందుకు పలు కారణాలు చెబుతున్నారు. మొదటి కారణం రష్యా ఉక్రెయిన్ యుద్ధం. ఇప్పుడు పుతిన్ దృష్టి అంతా అక్కడే ఉందని చెప్తున్నారు. కొద్ది రోజుల క్రితం వాగ్నర్ చీఫ్ ప్రిగోజిన్ విమాన ప్రమాదంలో మరణించారు. ఆయన రష్యా అధ్యక్షుడి మీద కొద్ది రోజుల క్రితం తిరుగుబాటు చేశారు. దీన్ని ఉదహరిస్తూ కొంతమంది దీనిని హత్య అని అంటున్నారు. కాబట్టి వాగ్నర్ సైన్యం దాడి చేస్తుందని రష్యా అధ్యక్షుడు ఆందోళన చెందుతున్నారని చెప్తున్నారు.
Minister Roja: రోజాకు ఆ ఐదుగురితో విభేదాలు.. వారికి మంత్రి పెద్దిరెడ్డి అండదండలు!
వీటన్నింటిలో పుతిన్‌ను అరెస్టు చేయడంపై చర్చ కూడా జరుగుతోంది. అయితే పుతిన్‌ను అరెస్టు చేయడం అంత సులభం కాదు. మొదట, ఐసీసీ ఈ అరెస్ట్ వారెంట్ జారీ చేసినప్పుడు, రష్యా కూడా దానిని వ్యతిరేకించింది. దీనితో పాటు అంతర్జాతీయ క్రిమినల్ చట్టం ప్రకారం దేశాధినేతకు అనేక మినహాయింపులు ఇచ్చారు. కాబట్టి ఆ నియమం రష్యా అధ్యక్షుడికి కూడా వర్తిస్తుంది. అందుకే పుతిన్‌ని అరెస్ట్ చేయడం అంత ఈజీ కాదు.
ప్రధాని మోదీతో పుతిన్ ఫోన్‌లో మాట్లాడారు
రష్యా అధ్యక్షుడు వ్లాదిమిర్ పుతిన్ ఆగస్టు 28న భారత ప్రధాని మోదీతో టెలిఫోన్ సంభాషణ జరిపారు. ఈ సందర్భంగా ఆయన జీ20 సదస్సుపై చర్చించారు. ఇటీవల దక్షిణాఫ్రికాలో జరిగిన బ్రిక్స్ సదస్సులో కుదిరిన ఒప్పందాల ప్రాముఖ్యత, బ్రిక్స్ విస్తరణ తదితర అంశాలపై కూడా ఇరువురు నేతలు చర్చించారు. రష్యా అధ్యక్షుడు వ్లాదిమిర్ పుతిన్‌తో ప్రధాని నరేంద్ర మోదీ మాట్లాడారని, ద్వైపాక్షిక సహకారానికి సంబంధించిన పలు అంశాలపై పురోగతిని సమీక్షించారని పీఎంవో తెలిపింది. పెద్ద ఎత్తున ఇంధన ప్రాజెక్టులను అమలు చేయాలని, లాజిస్టిక్స్ మౌలిక సదుపాయాలను విస్తరించాలని ఇరువురు నేతలు భావిస్తున్నారు. రెండు దేశాల మధ్య అంతరిక్ష సహకారాన్ని అభివృద్ధి చేయాలనే ఉద్దేశాన్ని కూడా ధృవీకరించారు.
G-20 అంటే ఏమిటి?
G-20 అనేది ప్రభుత్వాలు, కేంద్ర బ్యాంకులకు అంతర్జాతీయ వేదిక. ఈ గ్రూప్‌లో ఉన్న దేశాలను పరిగణనలోకి తీసుకుని దీనికి G20 అని పేరు పెట్టారు. అంతర్జాతీయ ఆర్థిక సహకారం, ఉగ్రవాదం, మానవ అక్రమ రవాణా, గ్లోబల్ వార్మింగ్ వంటి ముఖ్యమైన అంశాలపై అభిప్రాయాలను నిర్ణయించడానికి G20 ప్రధాన వేదిక. జీ-20లో ఉన్న దేశాలు ప్రపంచ GDPలో దాదాపు 85%, ప్రపంచ వాణిజ్యంలో 75% కంటే ఎక్కువ సంపదను కలిగి ఉన్నాయి. అలాగే ప్రపంచ జనాభాలో దాదాపు మూడింట రెండు వంతుల మందిని ఈ దేశాల్లో ఉన్నారు.
G20 1999 సంవత్సరంలో స్థాపించారు. దీని మొదటి సమావేశం డిసెంబర్ 1999లో జర్మనీ రాజధాని బెర్లిన్‌లో జరిగింది. ఆ సమయంలో అంతర్జాతీయ ఆర్థిక స్థిరత్వాన్ని ప్రోత్సహించడానికి సంబంధించిన విధానాన్ని చర్చించడానికి ఈ బృందం ఏర్పడింది.
