Pawan Kalyan: 33 శాతం పచ్చదనం తప్పనిసరి.. పరిశ్రమలకు పవన్ స్ట్రాంగ్ వార్నింగ్.. ఏపీలో కొత్త నిబంధనలు!
ఆంధ్రప్రదేశ్ సమగ్ర ఆర్థిక పురోగతికి పారిశ్రామిక ప్రగతి ఎంత అవసరమో, పర్యావరణ పరిరక్షణ కూడా కీలకమని పవన్ కల్యాణ్(Pawan Kalyan) స్పష్టం చేశారు.
- Published By: V Santhosh Kumar , Published On : August 31, 2026 / 04:36 PM IST
pawan kalyan mandates 33 percentage green cover for all industries in andhra pradesh
- పరిశ్రమల్లో పచ్చదనం తప్పనిసరి అమలు
- పవన్ కల్యాణ్ కీలక ఆదేశాలు
- పర్యావరణ పరిరక్షణ అందరి బాధ్యత
Pawan Kalyan: ఆంధ్రప్రదేశ్ సమగ్ర ఆర్థిక పురోగతికి పారిశ్రామిక ప్రగతి ఎంత అవసరమో, అదే స్థాయిలో పర్యావరణ పరిరక్షణ కూడా అత్యంత కీలకమని రాష్ట్ర ఉప ముఖ్యమంత్రి పవన్ కల్యాణ్ స్పష్టం చేశారు. సోషల్ మీడియా వేదికగా స్పందించిన ఆయన, రాష్ట్రంలోని అన్ని పారిశ్రామిక యూనిట్లు పర్యావరణ నిబంధనలను కచ్చితంగా పాటించాలని విజ్ఞప్తి చేశారు. పారిశ్రామికవేత్తలు కేవలం లాభాలకే ప్రాధాన్యం ఇవ్వకుండా సమాజం పట్ల బాధ్యత కలిగి ఉండాలని, అభివృద్ధి, ప్రకృతి పరిరక్షణ సమాంతరంగా సాగినప్పుడే స్థిరమైన ప్రగతి సాధ్యమవుతుందని ఈ సందర్భంగా ఆయన అభిప్రాయపడ్డారు.
కాలుష్య నియంత్రణ – పారిశ్రామికవేత్తల బాధ్యత:
కాలుష్య నియంత్రణ మండలి (PCB) నిర్దేశించిన మార్గదర్శకాల ప్రకారం ప్రతీ పరిశ్రమ తమ ప్రాంగణంలో కనీసం 33 శాతం విస్తీర్ణంలో పచ్చదనాన్ని అభివృద్ధి చేయాలని పవన్ కల్యాణ్ పిలుపునిచ్చారు. మొక్కలు నాటడం ద్వారా వాయు కాలుష్యాన్ని సమర్థవంతంగా అరికట్టవచ్చని, అలాగే ప్రతికూల వాతావరణ మార్పుల ప్రభావాన్ని గణనీయంగా తగ్గించవచ్చని తెలిపారు. ఈ నిబంధనను ఒక చట్టపరమైన బాధ్యతగా కాకుండా, సామాజిక బాధ్యతగా (CSR) స్వీకరించి పారిశ్రామికవేత్తలు ముందుకొచ్చి భావితరాలకు స్వచ్ఛమైన వాతావరణాన్ని అందించాలని ఆయన ఆకాంక్షించారు.
2047 లక్ష్యం – ఏపీ-గ్రీన్ సంస్థకు ఆదేశాలు:
రాష్ట్రవ్యాప్తంగా ఉన్న పరిశ్రమల్లో ఈ 33 శాతం హరిత విస్తీర్ణం నిబంధన అమలయ్యేలా కాలుష్య నియంత్రణ మండలి, ఏపీ-గ్రీన్ సంస్థలు ప్రత్యేక దృష్టి సారించాలని డిప్యూటీ సీఎం(Pawan Kalyan) ఆదేశించారు. 2047 నాటికి ఆంధ్రప్రదేశ్ మొత్తం భూభాగంలో 50 శాతం పచ్చదనాన్ని సాధించాలనేది ప్రభుత్వ మహత్తర సంకల్పమని ఆయన వెల్లడించారు. ఈ హరిత లక్ష్యాన్ని చేరుకోవడంలో పారిశ్రామిక వర్గాలు భాగస్వాములై, రాబోయే తరాలకు ఆరోగ్యకరమైన, పచ్చని భవిష్యత్తును అందించడానికి కృషి చేయాలని పవన్ కల్యాణ్ కోరారు.
