Vertical Transmission… తల్లి గర్భంలోని పిండానికి కూడా కరోనా వ్యాపిస్తుందా?
- Published By: veegamteam ,Published On : April 8, 2020 / 08:07 AM IST
ప్రపంచవ్యాప్తంగా కరోనా వైరస్ మహమ్మారి విలయతాండవం చేస్తోంది. లక్షల మంది కరోనా బారిన పడ్డారు. వేలాది మందిని కరోనా బలి తీసుకుంది. ఇంకా కేసులు, మరణాల సంఖ్య పెరుగుతూనే ఉంది. యావత్ మానవాళికి ముప్పుగా మారిన కరోనా కారణంగా ప్రపంచవ్యాప్తంగా ఎన్నో విషాదకర సంఘటనలు చోటుచేసుకుంటున్నాయి. చిన్న, పెద్ద.. ముసలి, ముతకా.. పేద, ధనిక.. అనే బేధం లేదు. కరోనా అందరిని కాటేస్తోంది. తాజాగా మరో షాకింగ్ ఘటన వెలుగు చూసింది. తల్లి గర్భంలోని పిండానికి కూడా కరోనా సోకిందనే వార్తలు కలకలం రేపుతున్నాయి.
శిశువుకి జన్మనిచ్చిన కరోనా సోకిన గర్భిణి.. పుట్టిన కాసేపటికే శిశువు మరణం:
అమెరికాలోని లూసియానా రాష్ట్రంలో సోమవారం(ఏప్రిల్ 6,2020) చోటుచేసుకొన్న విషాదం మిస్టరీగా మారింది. ఈ మిస్టరీపై డాక్టర్లు, శాస్త్రవేత్తలు మల్లగుల్లాలు పడుతున్నారు. లూసియానా రాష్ట్రంలో వారం రోజుల కిందట నెలలు నిండని (22 వారాల) గర్భిణి అరోగ్య సమస్యలతో స్థానిక ఆసుపత్రిలో చేరింది. శ్వాసకోశ సంబంధ సమస్యతో బాధపడుతున్నట్టు చికిత్స చేసిన డాక్టర్ క్లార్క్‌ గుర్తించారు. ఆమె రక్తంలో ఆక్సీజన్‌ పరిమాణం చాలా తక్కువగా ఉన్నట్టు తేల్చి కరోనా పరీక్ష జరుపగా పాజిటివ్‌గా వచ్చింది. ఆమె సోమవారం పాపకు జన్మనిచ్చింది. ఆ పాప కొన్ని గంటల వ్యవధిలోనే కన్నుమూసింది. పాప బతికే అవకాశాలు ఆరు శాతమే అని డాక్టర్ క్లార్స్‌ చెప్పినట్టే జరగడంతో.. నెలలు నిండని కారణంగానే పసిగుడ్డు కన్నుమూసిందనే అభిప్రాయానికి వచ్చేవారు. అయితే కరోనా మహమ్మారి తల్లి గర్భంలోని పసిగుడ్డును కూడా కాటేసిందా? అనేది ప్రస్తుతం చర్చనీయాంశంగా తయారైంది. దీనికి సంబంధించి పరీక్షలు చేస్తున్నట్టు డాక్టర్ క్లార్క్‌ తెలిపారు.
వర్టికల్‌ ట్రాన్స్‌మిషన్‌ గుట్టు తేలేనా?
తల్లికి కరోనా పాజిటివ్‌ వచ్చినందున అది బిడ్డకు కూడా వ్యాపించిందా? అనేది డాక్టర్లను కలిచివేస్తున్న ప్రశ్న. ఇలా జరగడాన్ని వైద్య పరిభాషలో వర్టికల్‌ ట్రాన్స్‌మిషన్‌ అంటారు. తల్లి గర్భంలోని పిండానికి కూడా వైరస్ వ్యాపిస్తుందా? అనేది ప్రస్తుతం ప్రపంచవ్యాప్తంగా అధ్యయనాలకు విషయంగా మారింది. కొన్నిరోజులక్రితం చైనాలో పరిశోధనలు కూడా జరిగాయి. అయితే, వర్టికల్‌ ట్రాన్స్‌మిషన్‌పై పూర్తి నిర్ధారణ రాలేదు. లూసియానా ఘటనలో పసిగుడ్డుకు కరోనా ఉన్నట్టు తేలితే.. ఇది అతి తక్కువ వయసు కరోనా మరణంగా రికార్డులకెక్కనున్నది. అంతేకాకుండా ‘తల్లి గర్భంలోనూ కొవిడ్‌-19 వ్యాప్తి చెందుతుందనేది నిర్ధారణ అవుతుంది. అదే జరిగితే కరోనా విపత్తులో మరో ముప్పు పొంచి ఉందనేది బహిర్గతమవుతుంది.
పాలమూరులో పసికందుకు కరోనా:
తెలంగాణలోనూ కరోనా మహమ్మారి విజృంభిస్తోంది. రోజురోజుకి కరోనా కేసుల సంఖ్య పెరుగుతోంది. కాగా, మహబూబ్‌నగర్‌ జిల్లా కేంద్రంలో 23 రోజల పసికందుకు కరోనా వైరస్ సోకడం కలకలం రేపింది. కుటుంబసభ్యుల నుంచి చిన్నారికి కరోనా వ్యాపించినట్టు వైద్యులు అనుమానిస్తున్నారు. మెరుగైన చికిత్స కోసం పాపను సికింద్రాబాద్‌లోని గాంధీ ఆసుపత్రిలోని ఐసొలేషన్‌ వార్డుకు పసికందుని తరలించారు.
See Also | ఎక్కువగా కరోనా దెబ్బతిన్న 10 దేశాలివే : 15లక్షలకు చేరువలో కేసులు,80వేలు దాటిన మరణాలు
