ప్రముఖ బాలీవుడ్ హెయిర్ స్టయిలిస్ట్ అరెస్ట్

బాలీవుడ్ ప్రముఖులను ఒక్కొక్కరిగా విచారిస్తూ.. డ్రగ్స్ కేసులో పలువురిని ప్రశ్నించిన నార్కోటిక్స్ కంట్రోల్ బ్యూరో(NCB), లేటెస్ట్‌గా ప్రముఖ హెయిర్ స్టైలిస్ట్ సూరజ్ గోదాంబేను అరెస్టు చేసింది. సూరజ్‌ను కొకైన్‌తో పాటు నార్కోటిక్స్ కంట్రోల్ బ్యూరో అరెస్టు చేసింది. గోదాంబే అనేక బ్లాక్ బస్టర్ సినిమాలకు మేకప్ మేన్‌గా కూడా పనిచేశారు. సూరజ్ గోదాంబే అరెస్టును ఎన్‌సిబి అధికారులు ధృవీకరించారు. సూరజ్ గోదాంబేను 16 బాటిల్స్‌తో NCB అరెస్ట్ చేసింది. ప్రతి బాటిల్‌లో సుమారు 11 గ్రాముల కొకైన్ ఉన్నట్లుగా అధికారులు గుర్తించారు.



ఈ కొకైన్‌ను అతని ఇంటి నుంచి స్వాధీనం చేసుకున్నారు. దొరికిన పరిమాణాన్ని బట్టి చూస్తే అది వాడుకునేందుకు తెచ్చినది మాత్రమే కాదని, వాణిజ్య పరిమాణంలో ఉందని అధికారులు తెలిపారు. ఎన్‌సిబి జాయింట్ డైరెక్టర్ సమీర్ వాంఖడే నేతృత్వంలోని ఆపరేషన్‌లో సూరజ్ గోదాంబే పట్టుబడ్డాడు. గోదాంబేను డ్రగ్ స్మగ్లర్‌తో సహా అరెస్టు చేశారు.



ఇద్దరిపై నార్కోటిక్స్ డ్రగ్స్ అండ్ ఫిజికోట్రోపిక్ సబ్‌స్టాన్స్ యాక్ట్ కింద వివిధ సెక్షన్ల కింద కేసు నమోదు చేశారు. ఇద్దరినీ ఇప్పుడు కోర్టులో హాజరుపరుస్తారు. అయితే, ఇద్దరి అరెస్టుకు సుశాంత్ సింగ్ రాజ్‌పుత్ మరణానికి సంబంధం లేదని అధికారులు వెల్లడించారు. సూరజ్ గోదాంబే బాలీవుడ్ ప్రముఖులు వరుణ్ ధావన్, అర్బాజ్ ఖాన్, రాజ్‌కుమార్ రావులకు హెయిర్ స్టయిలిస్ట్‌గా పనిచేశాడు.

ఈ సమయంలో రూ .2.5 కోట్ల విలువైన ‘చరాస్’ని, రూ .13.51 లక్షల విలువైన నగదును దర్యాప్తు సంస్థ స్వాధీనం చేసుకుంది.