E Commerce Flash Sales : ఈ-కామర్స్ ఫ్లాష్ సేల్స్ పై నిషేధం..!

ఈ-కామర్స్ మోసాలకు చెక్ పెట్టేందుకు కేంద్ర ప్రభుత్వం కీలక నిర్ణయం తీసుకుంది. ఆన్ లైన్ కామర్స్ వేదికల ద్వారా వస్తువులు, సేవల మిస్ సెల్లింగ్, మోసపూరిత ఫ్లాష్ సేల్స్ పై

E Commerce Flash Sales

E Commerce Flash Sales : ఈ-కామర్స్ మోసాలకు చెక్ పెట్టేందుకు కేంద్ర ప్రభుత్వం కీలక నిర్ణయం తీసుకుంది. ఆన్ లైన్ కామర్స్ వేదికల ద్వారా వస్తువులు, సేవల మిస్ సెల్లింగ్, మోసపూరిత ఫ్లాష్ సేల్స్ పై నిషేధం విధించాలని నిర్ణయించింది. అంతేకాదు, డిపార్ట్ మెంట్ ఫర్ ప్రమోషన్ ఆఫ్ ఇండస్ట్రీ అండ్ ఇంటర్నల్ ట్రేడ్ దగ్గర ఈ కంపెనీల రిజిస్ట్రేషన్ ను తప్పనిసరి చేయనున్నట్లు తెలిపింది. ఇంటర్నెట్ లో సెర్చ్ రిజల్ట్స్ ను మోసపుచ్చి యూజర్లను తప్పుదోవ పట్టించడంపై నిషేధంతో పాటు కస్టమర్ల ఇబ్బందులను పరిష్కరించేందు కు ఈ-కామర్స్ సైట్లు చీఫ్ కంప్లయన్స్ ఆఫీసర్, రెసిడెంట్ గ్రీవియెన్స్ ఆఫీసర్ ను తప్పనిసరిగా నియమించుకోవాలన్నది మరో ప్రతిపాదన.

ఏదేని చట్టం కింద నేర నివారణ, గుర్తింపు, దర్యాప్తు, విచారణకు సంబంధించి ఏ ప్రభుత్వ ఏజెన్సీ నుంచి ఆదేశాలు అందుకున్న 72 గంటల్లో ఈ-కామర్స్ వేదికలు అవసరమైన సమాచారం ఇవ్వాల్సి ఉంటుంది. ఇందుకోసం వినియోగదారుల పరిరక్షణ (ఈ-కామర్స్) నిబంధనలు, 2020లో ప్రభుత్వం పలు సవరణలను ప్రతిపాదించింది. ఈ ప్రతిపాదనలపై 15 రోజుల్లో (జూలై 6 నాటికి) అభిప్రాయాలు, సూచనలు తెలపాలని ప్రభుత్వం కోరింది.

కొన్నేళ్లుగా ఈ కామర్స్ సంస్థలు, కొత్త తరహా వ్యాపార విధానాలు అనుసరిస్తున్న నేపథ్యంలో వినియోగదారుల హక్కుల సంరక్షణ చట్టానికి సవరణలను కేంద్ర వినియోగ వ్యవహారాలశాఖ ప్రతిపాదించింది.

* భారత్ లో వ్యాపార కార్యకలాపాలు నిర్వహించాలనుకునే ప్రతి ఇ కామర్స్ సంస్థ తప్పనిసరిగా పరిశ్రమల ప్రోత్సాహం, అంతర్గత వాణిజ్య మండలి (డీపీఐఐటీ) దగ్గర నిర్దిష్ట సమయంలోపు పేరు నమోదు చేసుకోవాలి. ఈ రిజిస్ట్రేషన్ నెంబర్ ను వినియోగదారులకు జారీ చేసే ఇన్వాయిస్ ఆర్డర్ పై స్పష్టంగా కనిపించేలా ముద్రించాలి. ప్రతి ఈ కామర్స్ సంస్థ తన లీగల్ పేరు, ప్రధాన కార్యాలయం, శాఖల వివరాలు, వెబ్ సైట్ పేరు, వివరాలు, సంప్రదించాల్సిన ఇ మెయిల్, కస్టమర్ కేర్, ఫిర్యాదుల పరిష్కార అధికారి ల్యాండ్ లైన్, మొబైల్ ఫోన్ నెంబర్లను తన వెబ్ సైట్ లో స్పష్టంగా పొందుపరచాలి.

* వ్యాపార కార్యకలాపాలు-ఇతరత్రా కార్యక్రమాల్లో ఎలాంటి అనుచిత పద్ధతులు పాటించడానికి వీల్లేదు. వినియోగదారులను తప్పుదోవపట్టించే ప్రకటనలు ఇవ్వకూడదు. వినియోగదారుల నుంచి వచ్చే ఫిర్యాదుల సంఖ్యను బట్టి వాటి పరిస్కారం కోసం తగిన పరిమాణంలో ఫిర్యాదుల పరిష్కార యంత్రాంగాన్ని ఏర్పాటుచేయాలి.

* వినియోగదారుల హక్కుల చట్టంలోని నిబంధనలను అమలుచేసేందుకు చీఫ్ కాంప్లియన్స్ ఆఫీసర్ ను నియమించాలి. సదరు వ్యక్తి భారత్ లోనే నివసిస్తూ ఉండాలి.

* చట్టబద్ద ఏజెన్సీలతో సమన్వయం కోసం 24×7 అందుబాటులో ఉండే వ్యక్తి నెంబర్ అందించాలి.

* వినియోగదారుల ఫిర్యాదుల పరిష్కారం కోసం సంస్థలో పనిచేస్తూ, దేశంలో నివాసం ఉండే ఉద్యోగిని రెసిడెంట్ గ్రీవెన్స్ ఆఫీసర్ గా నియమించాలి. అతని వివరాలను వెబ్ సైట్, మొబైల్ యాప్ లో ప్రముఖంగా కనిపించేలా ప్రచురించాలి. వారి పేరు, ఫోన్ నెంబర్, ఫిర్యాదు చేయాల్సిన విధానం గురించి అందులో ఇవ్వాలి.

* ఈ కామర్స్ సంస్థలు విదేశీ వస్తువులను విక్రయిస్తే ఆ వస్తువులను ఎక్కడి నుంచి దిగుమతి చేసుకున్నారు? ఎవరి నుంచి కొనుగోలుచేశారు? ఈ వేదికపై ఎవరు విక్రయిస్తున్నారన్న వివరాలను పొందుపరచాలి.

* ఏ సంస్థా ఫ్లాష్ సేల్స్ నిర్వహించడానికి వీల్లేదు.

* మార్కెట్ లో బలంగా ఉన్న ఈ మార్కెట్ సంస్థలు తన స్థాయిని దుర్వినియోగం చేయడానికి కుదరదు.

* ఏ సంస్థా తనకు తానుగా వినియోగదారుడిగా చెప్పుకుని వస్తు, సేవల నాణ్యత గురించి తప్పుదోవ పట్టించే రివ్యూలు పోస్ట్ చేయకూడదు.

* రిటర్న్, రీఫండ్, ఎక్స్ఛేంజ్, ఏ తేదీలోపు ఉపయోగించాలి, వారెంటీ, గ్యారెంటీ, డెలివరీ, షిప మెంట్, రిటర్న్ షిప్ మెంట్ ఖర్చుల గురించి స్పష్టమైన సమాచారం ఇవ్వాలి.