ISRO : PSLV C-61 రాకెట్ ప్రయోగం.. రక్షణ రంగానికి ఎంతో కీలకం..
వర్షం పడుతున్నా, దట్టమైన పొగ మంచు ఉన్నా, మేఘాలు అడ్డుగా ఉన్నా, లేదా చిమ్మచీకట్లు ఉన్నా సరే.. భూ ఉపరితలాన్ని హై రెజల్యూషన్ తో చిత్రీకరిస్తుంది.
- Published By: 10TV Digital Team ,Published On : May 17, 2025 / 06:55 PM IST
ISRO: భారత అంతరిక్ష పరిశోధన కేంద్రం ఇస్రో మరో కీలక ప్రయోగానికి సిద్ధమైంది. శ్రీహరికోటలోని సతీశ్ ధావన్ స్పేస్ సెంటర్ నుంచి రేపు (మే 18) ఉదయం 6 గంటల 59 నిమిషాలకు పీఎస్ ఎల్ వీ సీ61 రాకెట్ ను ప్రయోగించనుంది. షార్ లోని మొదటి ప్రయోగ వేదిక నుంచి రాకెట్ ను లాంచ్ చేయనున్నారు. అత్యాధునిక సాంకేతిక పరిజ్ఞానంతో ఈ రాకెట్ ను రూపొందించారు. 1696 కిలోల రీశాట్ 1 బీ ని నిర్దేశిత కక్ష్యలోని ప్రవేశపెట్టనున్నారు.
ఇస్రోకు ఇది 101వ రాకెట్ ప్రయోగం. దీని ద్వారా భూ పరిశీలన ఉపగ్రహం (EOS) రీశాట్-1బీను కక్ష్యలోకి ప్రవేశపెట్టనున్నారు. ఈ ఉపగ్రహం ఎలాంటి వాతావరణ పరిస్థితుల్లోనైనా.. రాత్రి పగలు అనే తేడా లేకుండా.. భూమి ఉపరితలాన్ని స్పష్టంగా చిత్రీకరించగలదు. సాధారణంగా ఆప్టికల్ కెమెరా ఆధారిత ఉపగ్రహాలు ప్రతికూల వాతావరణంలో లేదా రాత్రి సమయాల్లో ఫోటోలను స్పష్టంగా చిత్రీకరించలేవు. రీశాట్ 1 బీ మాత్రం వర్షం పడుతున్నా, దట్టమైన పొగ మంచు ఉన్నా, మేఘాలు అడ్డుగా ఉన్నా, లేదా చిమ్మచీకట్లు ఉన్నా సరే.. భూ ఉపరితలాన్ని హై రెజల్యూషన్ తో చిత్రీకరిస్తుంది. ఈ విధంగా ఈ ఉపగ్రహాన్ని ఇస్రో సైంటిస్టులు డిజైన్ చేశారు.
ముఖ్యంగా దేశ రక్షణ ప్రయోజనాలకు ఈ రీశాట్ 1బీ రాడార్ సాంకేతికత చాలా కీలకం. రక్షణ రంగానికి కీలక ముందడుగుగా దీన్ని శాస్త్రవేత్తలు భావిస్తున్నారు. ఇది నిరంతరాయ నిఘా నేత్రంలా పని చేస్తుంది. పాకిస్తాన్, చైనా వంటి దేశాలతో ఉన్న సరిహద్దు ప్రాంతాలను పర్యవేక్షించడంలోనూ, అలాగే దేశ విశాలమైన తీర ప్రాంతాన్ని కాపాడటంలోనూ రక్షణ రంగానికి సహకారం అందించడంలో ఉపయోగపడుతుంది. శత్రువుల కదలికలు పసిగట్టడం, చొరబాట్లను గుర్తించడం, ఉగ్రవాద కార్యకలాపాలపై నిరంతరాయంగా ఒక విశ్వసనీయమైన నిఘా సమాచారాన్ని అందించేందుకు ఈ ఉపగ్రహం మన సైంటిస్టులకు ఎంతగానో ఉపయోగపడనుంది.
ఇందులో అత్యాధునికమైన సీ బ్యాండ్ ని అమర్చారు. సీ బ్యాండ్ అంటే సింథటిక్ అపార్చర్ రాడార్. ఈ వ్యవస్థను శాస్త్రవేత్తలు ఈ ఉపగ్రహంలో అమర్చారు. ఈ ఉపగ్రహంలో 5 విభిన్న ఇమేజింగ్ మోడ్ లు ఉన్నాయి. అత్యంత చిన్న వస్తువును కూడా గుర్తించగల అల్ట్రా హై రెజల్యూషన్ ఇమేజింగ్ నుంచి విశాలమైన ప్రాంతాలను పర్యవేక్షించడానికి ఉపయోగపడే బ్రాడర్ స్కాన్స్ కూడా దీనిలో అమర్చి ఉపగ్రహాన్ని డిజైన్ చేశారు సైంటిస్టులు.
Also Read: దేశద్రోహులు..! భారత్‌లో ఉంటూ పాకిస్తాన్‌కు గూఢచర్యం.. లేడీ యూట్యూబర్ సహా ఆరుగురు అరెస్ట్..
ఇది సైనిక అవసరాలతో పాటు వ్యసాయం, అటవీ సంపద పర్యవేక్షణ, అలాగే నేలలో తేమ శాతం అంచనా, భూగర్భ శాస్త్ర అధ్యయనాలు, వరదల సమయంలో సహాయక చర్యలు వంటి ప్రయోజనాలకు కూడా ఈ ఉపగ్రహం సేవలు అందించడం జరుగుతుంది. ఈ శాటిలైట్ బరువు 1696.24 కిలోలు. గతంలో ప్రయోగించిన రీశాట్ 1 ఉపగ్రహానికి కొనసాగింపుగానే ఈ రీశాట్ 1బీ ఉపగ్రహాన్ని ఇస్రో శాస్త్రవేత్తలు ప్రయోగించనున్నారు. ఈ ప్రయోగం అత్యంత కీలకం. దేశ రక్షణ రంగానికే కాకుండా అనేక విధాలుగా ఇది ఉపయోగపడుతుంది. కాబట్టి ఈ ప్రయోగం సక్సెస్ అవ్వాలని అందరూ కోరుకుంటున్నారు.
