Hyderabad Rain Alert: హైదరాబాద్ కు వాతావరణ శాఖ హెచ్చరిక.. బీ అలర్ట్
Hyderabad : తెలంగాణలో వర్షాలు దంచికొడుతున్నాయి. అయితే, గ్రేటర్ హైదరాబాద్ లో వచ్చే మూడు రోజులు మోస్తరు నుంచి భారీ వర్షాలు కురుస్తాయని
- Published By: 10TV Digital Team ,Published On : August 29, 2025 / 09:11 AM IST
Hyderabad
Hyderabad : తెలంగాణలో వర్షాలు దంచికొడుతున్నాయి. పలు జిల్లాల్లో బుధ, గురువారాల్లో రికార్డు స్థాయిలో వర్షం కురవడంతో లోతట్టు ప్రాంతాలు జలమయం అయ్యాయి. వాగులువంకలు పొంగిప్రవహిస్తున్నాయి. ముఖ్యంగా కామారెడ్డి, మెదక్, నిజామాబాద్ తదితర జిల్లాల్లో కుండపోత వర్షం కారణంగా జనజీవనం స్తంభించింది. అయితే, మరో రెండుమూడు రోజులు భారీ వర్షాలు కురుస్తాయని వాతావరణ శాఖ హెచ్చరికలు జారీ చేసింది. కామారెడ్డి, నిజామాబాద్ జిల్లాలకు వాతావరణ శాఖ రెడ్ అలర్ట్ జారీ చేసింది. మరోవైపు గ్రేటర్ హైదరాబాద్ (Hyderabad) లోనూ మోస్తరు నుంచి భారీ వర్షాలు కురుస్తాయని వాతావరణ శాఖ తెలిపింది.
Also Read: School Holidays : భారీ వర్షాల ఎఫెక్ట్.. తెలంగాణలోని ఈ జిల్లాల్లో నేడు స్కూళ్లు, కాలేజీలకు సెలవులు..
గ్రేటర్ హైదరాబాద్ లో వచ్చే మూడు రోజులు (శని, ఆది, సోమవారం) భారీ వర్షాలు కురిసే అవకాశం ఉందని వాతావరణ శాఖ హెచ్చరించింది. ఇప్పటికే రెండు రోజులుగా వర్షం కురుస్తుంది. గురువారం ఉదయం నుంచి రాత్రి వరకు పలు ప్రాంతాల్లో భారీ వర్షం పడగా.. మరికొన్ని ప్రాంతాల్లో మోస్తరు వర్షం కురిసింది. శుక్రవారం ఉదయం కూడా పలు ప్రాంతాల్లో వర్షం పడింది. అయితే, సోమవారం వరకు భారీ వర్షాలు పడే అవకాశం ఉన్న నేపథ్యంలో ప్రజలు అప్రమత్తంగా ఉండాలని వాతావరణ శాఖ సూచించింది.
బుధ, గురువారాల్లో కురిసిన వర్షాల కారణంగా గ్రేటర్ హైదరాబాద్ పరిధిలోని పలు లోతట్టు ప్రాంతాల్లోకి వర్షపు నీరు చేరింది. అయితే, వర్షాల నేపథ్యంలో జీహెచ్ఎంసీ అధికారులు అప్రమత్తం అయ్యారు. లోతట్టు ప్రాంతాల్లో ప్రజలకు ఇబ్బందులు తలెత్తకుండా చర్యలు చేపట్టారు. వాటర్ లాగింగ్ ప్రాంతాల్లో సిబ్బందిని నియమించి, డ్రైనేజీ, వరద ప్రమాదాల నివారణ చర్యలు తీసుకుంటున్నట్లు అధికారులు తెలిపారు.
నగరంలోని ఉస్మాన్ సాగర్, హిమాయత్ సాగర్ కు ఎగువ ప్రాంతాల నుంచి భారీగా వరద నీరు చేరుతోంది. క్యాచ్‌మెంట్ ప్రాంతాల్లో భారీ వర్షాల కారణంగా వాటర్ బోర్డు అధికారులు అప్రమత్తమయ్యారు. గేట్లను ఎత్తి మూసీలోకి నీటిని విడుదల చేస్తున్నారు.
ఉస్మాన్ సాగర్ (గండిపేట) జలాశయం పూర్తిస్థాయి నీటిమట్టం 1790 అడుగులు కాగా.. ప్రస్తుతం నీటిమట్టం 1789.95 అడుగులకు చేరింది. జలాశయానికి గురువారం సాయంత్రానికి 900 క్యూసెక్కులు చేరుతుండగా.. ఎనిమిది గేట్లు ఎత్తి 2704 క్యూసెక్కులను మూసీలోకి వదులుతున్నారు.
హిమాయత్ సాగర్ పూర్తిస్థాయి నీటిమట్టం 1763.50 అడుగులు కాగా.. ప్రస్తుతం 1763.10 అడుగులకు చేరుకుంది. రెండు గేట్లను మూడు అడుగుల మేరకు ఎత్తి నీటిని కిందికి వదులుతున్నారు. ఈ జలాశయం ఇన్‌ఫ్లో 1,800 క్యూసెక్కులు కాగా.. ఔట్ ఫ్లో 2300 క్యూసెక్కులుగా ఉంది.
