Maharashtra: మహా గవర్నర్ అన్ని హద్దుల్ని దాటారు.. కోశ్యారిపై శరద్ పవార్ ఫైర్

మీకు రోల్ మోడల్ ఎవరు అంటే ఇప్పటికే రోల్ మోడల్‭గా ఉన్న వారి గురించి మీరు ఆలోచించకండి. మహారాష్ట్రలో కొందరు వ్యక్తులు ఆదర్శవంతులుగా ఉన్నారు. ఛత్రపతి శివాజీ మహరాజ్‭నే తీసుకుంటే ఆయన పాత రోల్ మోడల్. బాబాసాహేబ్ అంబేద్కర్ నుంచి నితిన్ గడ్కరి వరకు ఎవరైనా కొత్త వ్యక్తుల్ని రోల్ మోడల్‭గా ఎంపిక చేసుకోండి

Maharashtra: మహారాష్ట్ర గవర్నర్ భగత్ సింగ్ కోశ్యారిపై ఎన్సీపీ అధినేత శరద్ పవార్ తీవ్ర ఆగ్రహం వ్యక్తం చేశారు. గవర్నర్ అన్ని హద్దుల్ని దాటారంటూ గురువారం మీడియా సమావేశంలో ఆయన అన్నారు. ఛత్రపతి శివాజీ మహరాజ్‭పై కోశ్యారి చేసిన వ్యాఖ్యలపై పవార్ స్పందిస్తూ ఈ విధంగా వ్యాఖ్యానించారు. ఈ విషయంలో ప్రధానమంత్రి నరేంద్రమోదీ కలుగజేసుకునేలా కోరతానని పవార్ అన్నారు.

‘‘గవర్నర్ కోశ్యారి అన్ని హద్దుల్ని దాటి పోయి ప్రవర్తిస్తున్నారు. రాష్ట్రపతి, ప్రధానమంత్రి ఈ విషయంలో కలుగజేసుకోవాలి. అంత పెద్ద స్థాయిలో ఉన్న వ్యక్తుల నుంచి ఇలాంటి మాటలు, ప్రవర్తన ప్రజల్లో చెడు సంకేతాలను పెంపొందిస్తాయి. అలాంటి వ్యక్తులు ఇంత బాధ్యతారాహిత్యంగా ప్రవర్తించడాన్ని నిలువరించాలి’’ అని మీడియా సమావేశంలో పవార్ అన్నారు.

ఈ విషయమై రాష్ట్రపతి ద్రౌపది ముర్ముకు ప్రధానమంత్రి నరేంద్రమోదీకి రాజ్యసభ ఎంపీ ఉదయంరాజె బోంస్లే లేఖ రాశారు. మరాఠా యోధుడైన ఛత్రపతి శివాజీపై గవర్నర్ అనుచిత వ్యాఖ్యలు చేశారని, ఆయనపై చర్యలు తీసుకోవాలని లేఖలో కోరారు.

నంబర్ 19న ఔరంగాబాద్‭లోని బాబాసాహేబ్ అంబేద్కర్ మరట్వాడ యూనివర్సిటీలో నిర్వహించిన ఓ కార్యక్రమంలో గవర్నర్ కోశ్యారీ మాట్లాడుతూ ‘‘మీకు రోల్ మోడల్ ఎవరు అంటే ఇప్పటికే రోల్ మోడల్‭గా ఉన్న వారి గురించి మీరు ఆలోచించకండి. మహారాష్ట్రలో కొందరు వ్యక్తులు ఆదర్శవంతులుగా ఉన్నారు. ఛత్రపతి శివాజీ మహరాజ్‭నే తీసుకుంటే ఆయన పాత రోల్ మోడల్. బాబాసాహేబ్ అంబేద్కర్ నుంచి నితిన్ గడ్కరి వరకు ఎవరైనా కొత్త వ్యక్తుల్ని రోల్ మోడల్‭గా ఎంపిక చేసుకోండి’’ అని అన్నారు.

గవర్నర్ చేసిన ఈ వ్యాఖ్యలతో మహారాష్ట్ర రాజకీయం వేడెక్కింది. ఈ విషయమై శివసేన ఇప్పటికే ఆగ్రహం వ్యక్తం చేస్తోంది. గవర్నర్ కోశ్యారీని తొలగించాలంటూ డిమాండ్ చేస్తోంది. అలాగే ముఖ్యమంత్రి షిండే సైతం రాజీనామా చేయాలని శివసేన డిమాండ్ చేస్తోంది.

BMC Polls: ఉద్ధవ్ థాకరేకు మద్దతుగా ముంబైలో ఎన్నికల ప్రచారం చేయనున్న తేజశ్వీ యాదవ్