KTR: తెలంగాణ ఎన్నికలపై కేటీఆర్ సంచలన కామెంట్స్

కేవీపీ రామచంద్రరావు, షర్మిల తెలంగాణ వాదులమని చెప్పుకుంటున్నారని కేటీఆర్ అన్నారు. తెలంగాణను వ్యతిరేకించిన వారిద్దరు..

KTR

KTR – BRS: తెలంగాణ అసెంబ్లీ ఎన్నికల(Telangana Elections 2023)కు వచ్చే నెల నోటిఫికేషన్ వచ్చే అవకాశాలు అంతగా లేవని తెలంగాణ మంత్రి కేటీఆర్ చెప్పారు. అదే జరిగితే మరో ఆరు నెలల తర్వాతే తెలంగాణ ఎన్నికలు జరుగుతాయని తెలిపారు. ఒకే దేశం-ఒకే ఎన్నికపై దేశ వ్యాప్తంగా చర్చ జరుగుతున్న వేళ కేటీఆర్ వ్యాఖ్యలకు మరింత ప్రాధాన్యం ఏర్పడింది.

అభ్యర్థుల ప్రకటన తర్వాత రాష్ట్రంలో బీఆర్ఎస్ పార్టీకి సానుకూల వాతావరణం మరింత పెరిగిందని కేటీఆర్ అన్నారు. హైదరాబాద్‌(Hyderabad)లోని ప్రగతి భవన్‌లో ప్రింట్ మీడియా రిపోర్టర్లతో కేటీఆర్ మాట్లాడారు.

బీఆర్ఎస్ పార్టీలో సిట్టింగులకు సీట్లు ఇవ్వకపోతే తమ దగ్గరికి వస్తారని ప్రతిపక్షాలు భావించాయని కేటీఆర్ చెప్పారు. వారి ఆశ తీరలేదని అన్నారు. తనకున్న నమ్మకం మేరకే కేసీఆర్ సీట్లు ఇచ్చారని చెప్పారు. కేసీఆర్ మూడోసారి ముఖ్యమంత్రిగా ప్రమాణస్వీకారం చేస్తారని అన్నారు. 90 స్థానాలకు పైగా గెలుస్తామని ధీమా వ్యక్తం చేశారు.

కేసీఆరే రాష్ట్రానికి ముఖ్యమంత్రిగా ఉండాల్సిన అవసరం ఉందని ప్రజలు భావిస్తున్నారని చెప్పారు. తమ ప్రభుత్వం అందించిన పథకాలు, అభివృద్ధి కార్యక్రమాలను ప్రజలే అద్భుతంగా వివరిస్తున్నారని చెప్పుకొచ్చారు. కేసీఆర్, బీఆర్ఎస్ పార్టీనే తెలంగాణకు శ్రీరామరక్ష అని తెలిపారు. ప్రతిపక్షాల తాపత్రయం రెండో స్థానం కోసమేనని అన్నారు.

ఇతర రాష్ట్రాల్లో ఉన్న అస్థిరత, నాయకత్వ లోపం మన రాష్ట్రంలో లేవని తెలిపారు. బీఆర్ఎస్ ముఖ్యమంత్రి అభ్యర్థి కేసీఆర్ అని, ప్రతిపక్షాల ముఖ్యమంత్రి అభ్యర్థి ఎవరో వారికే తెలియదని ఎద్దేవా చేశారు. ఆత్మగౌరవం ఉన్న తెలంగాణ ప్రజలు బానిసత్వ పార్టీలను అంగీకరించరని చెప్పారు. ప్రజలకు ఢిల్లీ బానిసలు కావాలా? తెలంగాణ బిడ్డ కావాలా? అని అన్నారు.

కేవీపీ రామచంద్రరావు, షర్మిల తెలంగాణ వాదులమని చెప్పుకుంటున్నారని కేటీఆర్ అన్నారు. తెలంగాణను వ్యతిరేకించిన వారిద్దరు కాంగ్రెస్ పార్టీని తెలంగాణలో అధికారంలోకి తేస్తామని అంటున్నారని వ్యాఖ్యానించారు. ఇంతటి దుస్థితి కాంగ్రెస్ పార్టీకి పట్టిందని అన్నారు. తెలంగాణ వ్యతిరేకతను నరనరాన నింపుకున్న కిరణ్ కుమార్ రెడ్డి, కేవీపీ రామచంద్రరావు, షర్మిల వంటి తెలంగాణ వ్యతిరేకులంతా ఏకమవుతున్నారని తెలిపారు.

Nadendla Manohar: పవన్ కల్యాణ్‌ను ఎవరైనా ఇంతలా దూషిస్తే ఈ తీరును..: నాదెండ్ల మనోహర్