Neha Bora: నేహా బోరాకు ఢిల్లీ పోలీసుల బిగ్ షాక్.. BNSS సెక్షన్ 126 కింద నోటీసులు.. అక్టోబర్ 29 వరకు డెడ్‌లైన్!
శాంతిభద్రతల బాండ్ కేసులో AISA అధ్యక్షురాలు నేహా బోరా (Neha Bora)పిటిషన్‌ను ఢిల్లీ హైకోర్టు కొట్టివేయాగా, అక్టోబర్ 29లోగా వివరణ ఇవ్వాలని పోలీసులు నోటీసులు ఇచ్చారు.
- Published By: V Santhosh Kumar , Published On : October 24, 2026 / 10:09 PM IST
Aisa president neha bora delhi police notice peace bond case delhi hc
Neha Bora: ఆల్ ఇండియా స్టూడెంట్స్ అసోసియేషన్ (AISA) జాతీయ అధ్యక్షురాలు నేహా బోరాకు ఢిల్లీ పోలీసులు మరో బిగ్ షాక్ ఇచ్చారు. శాంతిభద్రతల పరిరక్షణ నిమిత్తం జారీ చేసిన “శాంతిభద్రతల బాండ్” వ్యవహారంలో పోలీసులు తమ ఆరోపణలకు సంబంధించిన కీలక ఆధారాల పత్రాలను శనివారం నేహా బోరా న్యాయవాదికి అందజేశారు. ఢిల్లీ హైకోర్టు ఆమె (Neha Bora)వేసిన పిటిషన్‌ను కొట్టివేసిన మరుసటి రోజే, మందిర్ మార్గ్ పోలీస్ స్టేషన్‌లోని స్పెషల్ ఎగ్జిక్యూటివ్ మేజిస్ట్రేట్ (SEM) ఎదుట నేహా బోరా హాజరయ్యారు. ఈ కేసులో పోలీసులు లేవనెత్తిన అంశాలపై వివరణ ఇచ్చేందుకు ఆమెకు అక్టోబర్ 29 వరకు సమయం ఇచ్చారు.
BNSS సెక్షన్ 126 కింద నోటీసులు.. హైకోర్టులో నేహా బోరాకు ఎదురుదెబ్బ:
రాజధానిలో శాంతిభద్రతలకు విఘాతం కలిగించే అవకాశం ఉందనే నెపంతో అక్టోబర్ 17న భారతీయ నాగరిక్ సురక్షా సంహిత (BNSS) సెక్షన్ 126 కింద ఢిల్లీ పోలీసులు నేహా బోరాకు ప్రత్యేక నోటీసులు జారీ చేశారు. ఇందులో భాగంగా రూ. 10,000 పూచీకత్తు (బాండ్) సమర్పించాలని అధికారుల ఉత్తర్వుల్లో స్పష్టం చేశారు. పోలీసుల నోటీసులను సవాలు చేస్తూ నేహా బోరా వెంటనే ఢిల్లీ హైకోర్టును ఆశ్రయించినప్పటికీ, ఆమె పిటిషన్‌ను విచారించిన న్యాయస్థానం దానిని కొట్టివేయడంతో పోలీసుల చర్యలకు మార్గం సుగమమైంది.
నిషేధాజ్ఞల ఉల్లంఘన, ముందస్తు నిర్బంధం.. అక్టోబర్ 29న తుది సమాధానం:
అక్టోబర్ 16న మండీహౌజ్ వద్ద తిరంగా మార్చ్ నిర్వహించడం, జంతర్ మంతర్ వద్ద నిషేధాజ్ఞలు అమలులో ఉన్నప్పటికీ నిరసనల్లో పాల్గొనడం వంటి ఆరోపణలపై ఈ చర్యలు తీసుకున్నట్లు పోలీసులు తెలిపారు. కనాట్ ప్లేస్‌లో కాక్‌రోచ్ జనతా పార్టీ (CJP) చేపట్టిన ‘లెహ్రా దో తిరంగా’ ర్యాలీకి వెళ్తుండగా నేహా బోరాను ముందస్తుగా నిర్బంధించి మరుసటి రోజు విడుదల చేశారు. ప్రస్తుతం పోలీసుల ఆధారాలను పరిశీలించి, అక్టోబర్ 29న స్పెషల్ ఎగ్జిక్యూటివ్ మేజిస్ట్రేట్ ముందు నేహా బోరా తన పూర్తి వివరణ ఇవ్వాల్సి ఉంది.
