Fauja Singh: 114ఏళ్ల లెజండరీ మారథాన్ రన్నర్.. రోడ్డు ప్రమాదంలో దుర్మరణం.. వాకింగ్‌కు వెళ్లిన సమయంలో ఘోరం.. ఎవరీ ఫౌజా సింగ్..

89 సంవత్సరాల వయసులో రన్నింగ్ ను సీరియస్ గా తీసుకున్నారు. ఫౌజా సింగ్ 2000 సంవత్సరంలో తన మొదటి రేసు లండన్ మారథాన్‌లో పాల్గొన్నారు.

Fauja Singh: ప్రముఖ మారథాన్ రన్నర్ ఫౌజా సింగ్ రోడ్డు ప్రమాదంలో చనిపోయారు. పంజాబ్‌లోని జలంధర్ జిల్లాలోని తన స్వస్థలమైన బియాస్ గ్రామంలో వాకింగ్ కు వెళ్లిన సమయంలో ఫౌజా సింగ్ ను గుర్తు తెలియని వాహనం ఢీకొట్టింది. ఈ ఘటనలో ఆయన చనిపోయారు. ఫౌజా సింగ్ వయసు 114 సంవత్సరాలు.

ఫౌజా సింగ్ కుటుంబ సభ్యులతో మాట్లాడిన రచయిత ఖుష్వంత్ సింగ్ ఆయన మరణాన్ని ధృవీకరించారు. “నా తలపాగాతో కూడిన సుడిగాలి ఇక లేదు. నా అత్యంత గౌరవనీయులైన ఎస్. ఫౌజా సింగ్ మరణాన్ని నేను తెలపాల్సి రావడం నాకు చాలా బాధగా ఉంది. మధ్యాహ్నం 3:30 గంటల ప్రాంతంలో ఆయన గ్రామం బయాస్‌లో రోడ్డు దాటుతుండగా గుర్తు తెలియని వాహనం ఢీకొట్టింది. నా ప్రియమైన ఫౌజా విశ్రాంతి తీసుకోండి” అని ఖుష్వంత్ ఎక్స్ లో పోస్ట్ చేశారు.

ఫౌజా సింగ్ జీవిత చరిత్ర ‘ది టర్బన్డ్ టోర్నాడో’ రాశారు కుష్వంత్ సింగ్. ఆ అనుభవజ్ఞుడైన రన్నర్‌ను జలంధర్‌లోని ఒక ప్రైవేట్ ఆసుపత్రికి తరలించగా, గాయాలతో మరణించాడని తెలిపారు. ఫౌజా సింగ్ కుమారుడు తమకు సమాచారం ఇచ్చిన వెంటనే అక్కడికి చేరుకున్నామని అదంపూర్ పోలీస్ స్టేషన్ ఎస్‌హెచ్‌ఓ హర్దీప్ సింగ్ తెలిపారు.

“ఇప్పటివరకు, ఫౌజా సింగ్‌ను ఢీకొట్టిన కారు ఆచూకీ లభించలేదు. ఈ విషయంపై మేము దర్యాప్తు చేస్తున్నాము. ఎఫ్‌ఐఆర్ నమోదు చేశాము. సంఘటన జరిగిన సమయంలో ఫౌజా సింగ్ ప్రధాన రహదారిపై ఉన్నారు. మేము త్వరలోనే నిందితులను గుర్తించి అరెస్ట్ చేస్తాము” అని ఎస్‌హెచ్‌ఓ హామీ ఇచ్చారు.

ప్రముఖ మారథాన్ రన్నర్ మృతి పట్ల ప్రధానమంత్రి నరేంద్ర మోదీ విచారం వ్యక్తం చేశారు. ఆయన కుటుంబానికి సంతాపం తెలిపారు. పంజాబ్ గవర్నర్ , చండీగఢ్ అడ్మినిస్ట్రేటర్ గులాబ్ చంద్ కటారియా సైతం ఫౌజా సింగ్ మృతి పట్ల సంతాపం వ్యక్తం చేశారు. “లెజెండరీ మారథాన్ రన్నర్ సర్దార్ ఫౌజా సింగ్ జీ మరణం చాలా బాధాకరం. 114 ఏళ్ల వయసులో, ఆయన ‘నాషా ముక్త్, రంగాలా పంజాబ్’ మార్చ్‌లో అసమానమైన స్ఫూర్తితో నాతో చేరారు. ఆయన వారసత్వం మాదకద్రవ్య రహిత పంజాబ్‌కు స్ఫూర్తినిస్తూనే ఉంటుంది. ఓం శాంతి ఓం,” అని ఆయన Xలో పోస్ట్ చేశారు.

Also Read: గుడ్‌న్యూస్‌.. బుల్లెట్‌ ట్రైన్ ప్రాజెక్టులో నెక్స్ట్‌ జనరేషన్‌ ఈ10 షింకాన్సెన్ ట్రైన్‌లు.. జపాన్‌, భారత్‌లో ఒకేసారి.. వావ్..

ఎవరీ ఫౌజా సింగ్..
ప్రపంచంలోనే అత్యంత వృద్ధ మారథానర్‌గా పేరు పొందిన ఐకానిక్ రన్నర్ ఫౌజా సింగ్. సోమవారం జరిగిన రోడ్డు ప్రమాదంలో 114 ఏళ్ల వయసులో మరణించారు. ఆయన 1911 ఏప్రిల్ 1న పంజాబ్‌లోని జలంధర్‌లోని బెయాస్ గ్రామంలో జన్మించారు. సోమవారం మధ్యాహ్నం జలంధర్-పఠాన్‌కోట్ హైవేపై ఒక కారు ఆయనను ఢీకొట్టింది. ఆయన తలకు తీవ్ర గాయమైంది. ఫౌజాను వెంటనే ఆసుపత్రికి తరలించారు. సోమవారం రాత్రి 7.30 గంటలకు ఆయన మరణించారు.

89 సంవత్సరాల వయసులో రన్నింగ్ ను సీరియస్ గా తీసుకున్నారు. ఫౌజా సింగ్ 2000 సంవత్సరంలో తన మొదటి రేసు లండన్ మారథాన్‌లో పాల్గొన్నారు. ఫౌజా సింగ్ తన గ్రామంలో “ఒక ప్రదేశం నుండి మరొక ప్రదేశానికి” పరిగెత్తడంలో ప్రసిద్ధి చెందారని గ్రామస్తులు గుర్తుచేసుకున్నారు.

ఫౌజా సింగ్ లండన్, టొరంటో, న్యూయార్క్‌లలో జరిగిన తొమ్మిది 26-మైళ్ల (42-కిలోమీటర్లు) మారథాన్‌లలో పోటీ పడ్డారు. ఆయన ఉత్తమ సమయం టొరంటోలో నమోదు చేశారు. 5 గంటల 40 నిమిషాల 4 సెకన్లలో పూర్తి చేశారు. ఆయన 2004 ఏథెన్స్ గేమ్స్, 2012 లండన్ ఒలింపిక్స్ లకు టార్చ్ బేరర్ గా ఉన్నారు.

100 ఏళ్ల వయసులో ఫుల్ మారథాన్ పూర్తి చేసి, ఆ విధంగా చేసిన అతి పెద్ద వయస్కుడిగా నిలిచారు మారథాన్ రన్నర్ ఫౌజా సింగ్. ‘టర్బన్డ్ టోర్నడో’ అని ముద్దుగా పిలువబడే ఫౌజా సింగ్ కు ఈ సంవత్సరం ఏప్రిల్ 1న 114 ఏళ్లు నిండాయి. 14 సంవత్సరాల (2000 నుండి 2013 వరకు) తన కెరీర్‌లో మొత్తం తొమ్మిది ఫుల్ మారథాన్‌లు పరిగెత్తారు. బాక్సింగ్ లెజెండ్ ముహమ్మద్ అలీ, ఫుట్‌బాల్ లెజెండ్ డేవిడ్ బెక్‌హామ్‌ వంటి ప్రముఖలతో కలిసి ఒక ప్రధాన క్రీడా బ్రాండ్ కోసం ఒక ప్రకటనలో కనిపించారు.