NIA Raids: తెలుగు రాష్ట్రాల్లోని పలుచోట్ల ఎన్ఐఏ అధికారుల సోదాలు.. భారీగా పోలీసుల మోహరింపు
ఏపీ, తెలంగాణ రాష్ట్రాల్లోని పలుచోట్ల ఎన్ఐఏ (నేషనల్ ఇన్వెస్టిగేషన్ ఏజెన్సీ) అధికారులు సోదాలు నిర్వహించారు. అమరుల బంధు మిత్రుల సంఘం, పౌరహక్కుల సంఘం కీలక నేతల ఇళ్లలో ఈ సోదాలు కొనసాగుతున్నాయి.
- Published By: 10TV Digital Team ,Published On : October 2, 2023 / 09:32 AM IST
NIA Raids
NIA Raids In Telugu States : ఏపీ, తెలంగాణ రాష్ట్రాల్లోని పలుచోట్ల ఎన్ఐఏ (నేషనల్ ఇన్వెస్టిగేషన్ ఏజెన్సీ) అధికారులు సోదాలు నిర్వహించారు. హైదరాబాద్, వరంగల్, నెల్లూరు, తిరుపతి, శ్రీకాకుళం, గుంటూరు జిల్లాల్లో పలువురు పౌరహక్కుల నేతల ఇళ్లలో ఎన్ఐఏ అధికారుల సోదాలు కొనసాగాయి. సోమవారం తెల్లవారు జాము 5.30 గంటల నుంచి ఎన్ఐఏ బృందాలు సోదాలు నిర్వహిస్తున్నాయి. అమరుల బంధు మిత్రుల సంఘం, పౌరహక్కుల సంఘం కీలక నేతల ఇళ్లలో అధికారుల తనిఖీలు కొనసాగుతున్నాయి. మావోయిస్టులకు సహకరిస్తున్నారనే ఆరోపణలతో ఈ సోదాలు జరుగుతున్నట్లు తెలిసింది.
హైదరాబాదులో అల్వాల్ లో నివసిస్తున్న భవాని, న్యాయవాది సురేష్ ఇళ్లలో, వరంగల్ జిల్లాలో అనిత, శాంతమ్మ ఇళ్లలో ఎన్ఐఏ అధికారులు సోదాలు నిర్వహించారు. ఆంధ్రప్రదేశ్ రాష్ట్రం నెల్లూరు జిల్లాలోని ఉస్మాన్ సాహెబ్ పేటలో ఉంటున్న ఎల్లంకి వెంకటేశ్వర్లు, తిరుపతిలో ఉంటున్న క్రాంతి చైతన్య ఇంట్లో ఎన్ఐఏ సోదాలు కొనసాగాయి. నెల్లూరులో అరుణ ఇంట్లో, గుంటూరులో డాక్టర్ రాజారావు ఇంట్లో, శ్రీకాకుళం జిల్లా కెఎన్పీఎస్ రాష్ట్ర సహాయ కార్యదర్శి మిస్కా కృష్ణయ్య ఇంట్లో NIA సోదాలు కొనసాగాయి. అదేవిధంగా ప్రకాశం జిల్లా చీమకుర్తిలో కుల నిర్మూలన పోరాట సమితి నేత దుడ్డు వెంకట్రావు, సంతమాగులూరులో ఓరు శ్రీనివాసరావు, రాజమండ్రి బొమ్మెరులో పౌరహక్కుల నేత నాజర్, హార్లిక్స్ ఫ్యాక్టరీ ఉద్యోగి కోనాల లాజర్ ఇళ్లలోనూ ఎన్ఐఏ అధికారులు సోదాలు నిర్వహించారు.
తిరుపతి జిల్లాలోని చిల్లకూరు మండలం అల్లిపురంలో NIA అధికారులు తనిఖీలు నిర్వహించారు.కావలి బాలయ్య ను NIA పోలీసులు విచారించారు. ఈ విచారణలో భాగంగా మావోయిస్టులతో సంబంధాలపై ఆరా తీశారు. కేఎన్పీఎస్ సంస్థలో బాలయ్య జిల్లా అధ్యక్షుడిగా ఉన్నారు. ఇటీవల ఎన్ఐఏ పోలీసులు రాష్ట్ర అధ్యక్షుడు దొందు ప్రభాకర్ ను అరెస్టు చేశారు. అదేవిధంగా నెల్లూరు జిల్లాలో ఫతేఖాన్ పేట రైతు బజార్ సమీపంలో చైతన్య మహిళా సంఘం నేత అన్నపూర్ణమ్మ నివాసంలోనూ NIA అధికారులు సోదాలు నిర్వహించారు. గతంలో కూడా అన్నపూర్ణ, అనూష ఇళ్లలో ఎన్ఐఏ అధికారులు సోదాలు నిర్వహించారు. శ్రీకాకుళం పట్టణంలోని మచ్చువాని పేటలో NIA అధికారులు సోదాలు నిర్వహించారు. వామపక్ష భావజాలం కలిగిఉన్న కుల నిర్మూలన పోరాట సమితి నేత మస్కా కృష్ణయ్య ఇంట్లో ఈ సోదాలు కొనసాగాయి.
