Gold Loan: బంగారంపై రుణాలు తీసుకుంటున్నారా? ఆర్‌బీఐ కొత్త నిబంధనలను తెలుసుకోవాల్సిందే..
అంత కన్నా తక్కువ స్వచ్ఛత ఉన్న బంగారానికి రుణం మంజూరు కాదు.
- Published By: 10TV Digital Team ,Published On : May 23, 2025 / 03:36 PM IST
దేశంలో బంగారు రుణాల సిస్టమ్‌లో పారదర్శకత పెంచేలా, వినియోగదారులకు మేలు చేకూరేలా భారతీయ రిజర్వ్ బ్యాంక్ (RBI) కీలక మార్పులు ప్రతిపాదించింది. బ్యాంకులు, NBFCలు (నాన్-బ్యాంకింగ్ ఫైనాన్షియల్ కంపెనీలు) జారీచేసే బంగారం, వెండి రుణాలకు ఈ కొత్త నిబంధనలు వర్తిస్తాయి. గురువారం ఈ ముసాయిదా మార్గదర్శకాలు వెలువడ్డాయి.
♥ LTV 75%కి పరిమితం: బంగారు రుణాలకు రుణ విలువ నిష్పత్తి (LTV) ఇప్పుడు గరిష్ఠంగా 75%. కొవిడ్ సమయంలో ఇది 80 శాతానికి పెరిగినా, మళ్లీ 75 శాతానికి తగ్గించారు. బులెట్ రిపేమెంట్ రుణాలకు అసలు, వడ్డీ కలిపి లెండింగ్ విలువ లెక్కిస్తారు.
♥ బంగారం మీదేనన్న రుజువు ఉండాలి: బంగారానికి సంబంధించిన రశీదు లేకుంటే అప్పు తీసుకునేవారు సంతకంతో కూడిన ధ్రువీకరణ పత్రాన్ని సమర్పించాలి. దానిలో అనుమానం వస్తే రుణం ఇవ్వకూడదు.
♥ బంగారం వివరాల సర్టిఫికెట్: అప్పు తీసుకునేవారికి బంగారం బరువు, స్వచ్ఛత, మినహాయింపులు, ఫొటోలతో కూడిన పూర్తి వివరాల సర్టిఫికెట్ అందించాలి. దీనివల్ల పారదర్శకత పెరుగుతుంది.
♥ ఏ బంగారం ఓకే?: 22 క్యారెట్ల కన్నా తక్కువ స్వచ్ఛత ఉన్న బంగారానికి రుణం మంజూరు కాదు. అయితే, బ్యాంకులు అమ్మే ఇండియా గోల్డ్ కాయిన్స్‌ను మాత్రం స్వీకరిస్తారు.
♥ వెండి రుణాలకు గ్రీన్ సిగ్నల్: తొలిసారిగా వెండి రుణాలకు అనుమతి వచ్చింది. అయితే, 925 స్వచ్ఛత ఉన్న ప్రత్యేక వెండి నాణేలపై మాత్రమే ఈ అవకాశం.
♥ బరువుపై పరిమితులు: ఒకే రుణంలో గరిష్ఠంగా 1 కిలో బంగారు ఆభరణాలు, 50 గ్రాముల బంగారు నాణేలు మాత్రమే తీసుకుంటారు.
♥ విలువ లెక్కింపు ఇలా: బంగారం విలువను 22 క్యారెట్ల ధర ప్రకారమే లెక్కిస్తారు. తక్కువ క్యారెట్ బంగారం అయినా, 22 క్యారెట్ల రేటునే ప్రామాణికంగా తీసుకుంటారు. ఇది రేట్ల స్థిరత్వానికి తోడ్పడుతుంది.
♥ స్పష్టమైన రుణ ఒప్పందం: రుణ ఒప్పంద పత్రాల్లో అన్ని ఛార్జీలు, బంగారం వివరాలు, వేలం ప్రక్రియ, చెల్లింపు గడువులు స్పష్టంగా పేర్కొనాలి.
(చదవండి: సీనియర్ సిటిజన్లకు సూపర్ స్కీమ్.. ఇలా పెట్టుబడి పెడితే కేవలం వడ్డీనే రూ. 12 లక్షలు సంపాదించవచ్చు! )
♥ బంగారం వాపసు త్వరగా: రుణం పూర్తిగా చెల్లించాక, 7 పనిదినాల్లోపు బంగారం తిరిగి ఇవ్వాలి. ఆలస్యమైతే రోజుకు రూ.5,000 జరిమానా చెల్లించాల్సి వస్తుంది.
ఈ మార్పులు.. బ్యాంకులు, NBFCలు ఇచ్చే బంగారు రుణాల ప్రక్రియను సులభతరం చేస్తాయని నిపుణులు ఆశిస్తున్నారు. ప్రస్తుతం ఈ ముసాయిదా మార్గదర్శకాలపై ప్రజాభిప్రాయ సేకరణ జరుగుతోంది. అందరి అభిప్రాయాలు స్వీకరించాక తుది నిబంధనలు వెలువడతాయి.
