US Shutdown: అమెరికాలో ముగిసిన 43 రోజుల షట్ డౌన్.. కానీ, భారీ నష్టమే మిగిల్చిందిగా.. 5 ముఖ్యమైన కారణాలు..
అమెరికాకు రావాల్సిన ఆదాయం పడిపోయింది. ఆపేసిన జీతాలు కూడా భారీగా చెల్లించాల్సి ఉంటుంది.
- Published By: 10TV Digital Team ,Published On : November 13, 2025 / 07:27 PM IST
US Shutdown: అమెరికా చరిత్రలో అత్యధిక కాలం నడిచిన షట్‌డౌన్ అధికారికంగా ముగిసి ఉండొచ్చు. కానీ దాని అనంతర పరిణామాలు ఆందోళనకు గురి చేస్తున్నాయి. అమెరికా వ్యవస్థలు స్తంభించిపోయాయి. ప్రభుత్వంపై ప్రజలకు నమ్మకం పోయింది. ఇదిలా ఉంటే.. అమెరికాను మరో షట్ డౌన్ భయం వెంటాడుతోంది. జనవరి 30 తర్వాత మరో షట్‌డౌన్ నెలకొనే అవకాశం ఉందనే వార్తలు ఆందోళన కలిగించే అంశం.
అమెరికా చరిత్రలోనే అత్యధిక కాలం (43 రోజులు) నడిచిన షట్‌డౌన్ బుధవారం ముగియడంతో కొంత ఉపశమనం కలిగింది. అయితే, ఈ షట్‌డౌన్ వల్ల కలిగే నష్టం నెలల తరబడి ఉంటుంది. ఇది మరొక షట్‌డౌన్‌కు కూడా విస్తరించవచ్చని, అది జనవరి 30న జరగనుందని తెలుస్తోంది. విమాన ప్రయాణంపై ప్రభావం, ఉద్యోగాలు కోల్పోవడం, ఆర్థిక కార్యకలాపాలలో బిలియన్ల నష్టం కోలుకోలేనిది.
43 రోజుల షట్ డౌన్ తో అమెరికా భారీగానే నష్టపోయింది. ఎయిర్ ట్రావెల్ దెబ్బతింది. జాబ్స్ పోయాయి. ద్రవ్యోల్బణం పెరిగింది. ఆర్థిక వ్యవస్థ తీవ్రంగా దెబ్బతింది. ఎయిర్ ట్రావెల్ దెబ్బతినడం వల్ల జరిగిన నష్టం అధికంగా ఉంది. ఎయిర్ ట్రావెల్ 10 శాతం కట్ చేసేయమని ఆర్డర్ ఇవ్వడం వల్ల ఉద్యోగులు ఆఫీసుకి రాలేదు. చాలా కంపెనీలు తమ విమానాలను సర్వీస్ చేయించడానికి పంపినట్టు సీఎన్ఎన్ తెలిపింది.
ఇక, అమెరికాకు రావాల్సిన ఆదాయం పడిపోయింది. ఆపేసిన జీతాలు కూడా భారీగా చెల్లించాల్సి ఉంటుంది. సుమారు 14 లక్షల మంది ఉద్యోగులు ఉన్నారు. కొంత జీతం తీసుకుని పని చేసిన వాళ్లు, అసలు జీతాలు రాకపోయినా పని చేసిన వాళ్లకు జీతాలు క్లియర్ చేయాలి. ఇదంతా క్లియర్ చేయాలంటే రెండు మూడు నెలలు పడుతుంది. అటు, ప్రభుత్వం మీద నమ్మకం సడలింది. దీని వల్ల భవిష్యత్తులో ఉద్యోగుల రిక్రూట్ మెంట్ విషయంలో ప్రభుత్వానికి ఇబ్బందులు తలెత్తొచ్చు.
ట్రంప్ సంతకం లక్షలాది మంది అమెరికన్లకు ఉపశమనం కలిగించినప్పటికీ.. ఆర్థిక వ్యవస్థ, పరిపాలనపై నమ్మకానికి జరిగిన నష్టం శాశ్వతంగా ఉంటుంది. పూర్తి విమాన కార్యకలాపాలు నెమ్మదిగా తిరిగి ప్రారంభమవుతాయి.
నష్టాల నుండి బయటపడేందుకు కొన్ని నెలల సమయం పట్టనుంది. దీనికి 5 కారణాలు ఉన్నాయి.
1. అమెరికాలో విమాన ప్రయాణం కోలుకోవడానికి నెలలు పడుతుంది..
ఫెడరల్ ఏవియేషన్ అడ్మినిస్ట్రేషన్ అత్యవసర ఉత్తర్వుల ద్వారా 40 విమానాశ్రయాలలో విమానాలను 10శాతం వరకు తగ్గించాలని విమానయాన సంస్థలను ఆదేశించింది. జీతాలు ఇవ్వకపోవడంతో ఎయిర్ ట్రాఫిక్ కంట్రోలర్లు ఉద్యోగం నుంచి తప్పుకున్నారు. షట్ డౌన్ సమయంలో పని చేసిన వారికి వెంటనే బకాయిలు అందవు. కొంతమంది సిబ్బంది వెంటనే విధులకు తిరిగి రావడానికి ఇష్టపడకపోవచ్చు. నివేదికల ప్రకారం, 2019లో షట్ డౌన్ సమయంలో ఎయిర్ ట్రాఫిక్ కంట్రోలర్లు తమ జీతాల బ్యాక్ లాగ్‌ను క్లియర్ చేయడానికి రెండు నెలలకు పైగా పట్టింది.
షట్‌డౌన్ ముగిసిపోయినప్పటికీ ఇది నెలలు, లేదా సంవత్సరాల పాటు విమాన ప్రయాణాన్ని ఉక్కిరిబిక్కిరి చేస్తుంది. కొంతమంది ఎయిర్ ట్రాఫిక్ కంట్రోలర్లు ఎప్పటికీ తమ ఉద్యోగాలకు తిరిగి రాకపోవచ్చు. వారు ప్రభుత్వ షట్‌డౌన్‌ల వల్ల ఉద్యోగాలను వదిలేస్తున్నారు. లేదా మారడానికి ప్రయత్నిస్తున్నారు.
అలాగే, నిరంతర షట్‌డౌన్ కారణంగా అనేక విమానయాన సంస్థలు తమ విమానాలను నిర్వహణ కోసం పంపాయి. ఆ విమానాలను తిరిగి గాల్లోకి తీసుకురావడానికి సమయం పడుతుంది. విమాన ప్రయాణ కార్యకలాపాలు దాదాపు సాధారణ స్థితికి రావడానికి కనీసం నవంబర్ 27 వరకు సమయం పడుతుంది.
2. అక్టోబర్ నెల ఉద్యోగాలు, ద్రవ్యోల్బణ డేటా విడుదల కావు..
ఈ ప్రతిష్టంభన అమెరికా ప్రభుత్వ డేటా సేకరణకు శాశ్వత నష్టం కలిగించొచ్చు. ఈ షట్‌డౌన్ అక్టోబర్ 2025 నుండి అనేక ముఖ్యమైన డేటా, ఆర్థిక నివేదికల విడుదలను నిరోధించవచ్చు. ఇది ఫెడరల్ స్టాటిస్టికల్ వ్యవస్థను శాశ్వతంగా దెబ్బతీసిందని.. అక్టోబర్ CPI, ఉద్యోగాల నివేదికలు ఎప్పటికీ విడుదల కాకపోవచ్చని తెలుస్తోంది.
3. ఆర్థిక వ్యవస్థను పునఃప్రారంభించడం అంత సులభం కాదు..
షట్‌డౌన్ సమయంలో వేలాది మంది ప్రయాణికులను తీసుకెళ్లే వేలాది విమానాలు టేకాఫ్ కాలేదు. అనేక రెస్టారెంట్లకు జనసంచారం తగ్గింది. ఆ నష్టాలను సరి చేయలేని పరిస్థితి. అమెరికా ఆర్థిక వ్యవస్థ 55 బిలియన్ డాలర్లు నష్టపోయింది. షట్‌డౌన్ వల్ల కలిగే ఆర్థిక నష్టం అధికంగా ఉంటుంది.
షట్‌డౌన్ కారణంగా బిలియన్ల కొద్దీ సమాఖ్య ఖర్చులు స్తంభించిపోయాయి. కాంట్రాక్టర్లు, చిన్న వ్యాపారులు, రైతులు.. పర్యాటక రంగాలు గ్రాంట్లు, రుణాలు , ప్రయాణాలను రద్దు చేయడం ద్వారా దెబ్బతిన్నారు. ఆర్థిక కార్యకలాపాలను షట్‌డౌన్‌కు ముందు స్థాయికి తీసుకురావడానికి నెలల సమయం పడుతుంది.
4. చెల్లింపు ప్రక్రియకు నెలలు పట్టొచ్చు..
నివేదిక ప్రకారం, అక్టోబర్ 10న పాక్షిక జీతం మాత్రమే పొందిన 1.4 మిలియన్ల మంది ఉద్యోగులను ఈ షట్‌డౌన్ దెబ్బతీసింది. అక్టోబర్ 24న పూర్తి జీతం చెల్లించలేకపోయారు. ఖర్చులు, తనఖాల కోసం ఉద్యోగులు బ్యాంకు రుణాలను కూడా ఆశ్రయించాల్సి వచ్చింది. నిధుల బిల్లు ఆమోదించబడిన తర్వాత ఫెడరల్ కార్మికులు, సెలవులో ఉన్న ఉద్యోగులు బకాయి చెల్లింపునకు అర్హులు.
5. ప్రభుత్వంపై విశ్వాసం పోతుంది, తిరిగి నియామకాలు చేపట్టడం అంత సులభం కాదు..
ఆర్థిక వ్యవస్థ తిరిగి పుంజుకున్నప్పటికీ, వ్యవస్థపై కోల్పోయిన నమ్మకం తిరిగి రాదు. ట్రంప్ నిధులను నిలిపివేయడం ప్రజల్లో విశ్వాసాన్ని దెబ్బతీసింది. ప్రభుత్వం తన పౌరులను కాపాడుతుందా లేదా అని చాలా మందిలో ప్రశ్న తలెత్తింది.
ప్రభుత్వ నిధులపై ఆధారపడని ఉద్యోగాలకు మారుతున్న ఎయిర్ ట్రాఫిక్ కంట్రోలర్ల మాదిరిగానే, ఈ షట్‌డౌన్ కారణంగా ట్రంప్ పరిపాలనపై నమ్మకం కోల్పోయింది. అమెరికా చరిత్రలో అత్యధిక కాలం నడిచిన షట్‌డౌన్ ముగిసినట్లు అనిపించినప్పటికీ, దాని ప్రభావం తదుపరి షట్‌డౌన్ వరకు కొనసాగే అవకాశం ఉంది.
Also Read: భారత్‌తో యుద్ధానికి రెడీ- రెచ్చిపోయిన పాకిస్తాన్ మంత్రి..
