సంజు శాంసన్‌ను కొనేందుకు పావులు కదుపుతోన్న CSK.. రుతురాజ్‌ను వదులుకుంటుందా? అసలు చిక్కుముడి ఇదే..

అంత విలువైన ఆటగాడు CSKలో ఎవరున్నారు? అనేది మిలియన్ డాలర్ల ప్రశ్న.

ఐపీఎల్ ట్రేడింగ్ విండోలో ఒక సంచలన వార్త ఇప్పుడు హాట్ టాపిక్‌గా మారింది. రాజస్థాన్ రాయల్స్ (RR) కెప్టెన్, స్టార్ బ్యాటర్ సంజు శాంసన్‌ను తమ జట్టులోకి తీసుకునేందుకు చెన్నై సూపర్ కింగ్స్ (CSK) తీవ్రంగా ప్రయత్నిస్తున్నట్లు తెలుస్తోంది. ఈ వార్తలను CSK అధికారి ఒకరు ధ్రువీకరించడంతో క్రికెట్ వర్గాల్లో ఒక్కసారిగా ఉత్కంఠ పెరిగింది.

“అవును, మేము సంజును పరిగణనలోకి తీసుకుంటున్నాం” అని CSK అధికారి ఒకరు చెప్పినట్లు Cricbuzz పేర్కొంది. అసలు సంజును CSK ఎందుకు కొనాలనుకుంటోంది? దీనికి బదులుగా రాజస్థాన్‌కు ఎవరిని ఇస్తారు? ఈ మెగా ట్రేడ్ వెనుక ఉన్న అసలు కథేంటో చూద్దాం…

CSKకి సంజు ఎందుకు కావాలి?
CSK సంజుపై అంత ఆసక్తి చూపించడానికి బలమైన కారణాలున్నాయి. సంజు ఒక స్టార్ వికెట్ కీపర్-బ్యాటర్. అతను ఓపెనర్‌గా, మిడిల్ ఆర్డర్‌లో ఎక్కడైనా ఆడగలడు. కెప్టెన్సీ అనుభవం కూడా ఉంది. ధోనీ తర్వాత జట్టులో ఒక అనుభవజ్ఞుడైన వికెట్ కీపర్ పాత్రను సంజు సమర్థవంతంగా పోషించగలడు.

ఈ ట్రేడ్‌కు అతిపెద్ద అడ్డంకి ఒకటి ఉంది. సంజు శాంసన్‌ను రాజస్థాన్ రాయల్స్ రూ.18 కోట్లకు రిటైన్ చేసుకుంది. కాబట్టి, అతనికి సమానమైన విలువైన ఆటగాడిని CSK వదులుకోవాల్సి ఉంటుంది.

ప్రస్తుతం CSK కెప్టెన్ రుతురాజ్ గైక్వాడ్‌కు కూడా అదే రూ.18 కోట్ల ఫీజు ఉంది. దీంతో రుతురాజ్‌ను రాజస్థాన్‌కు ఇచ్చి, సంజును తీసుకుంటారనే ఊహాగానాలు మొదలయ్యాయి.

CSK హెడ్ కోచ్ స్టీఫెన్ ఫ్లెమింగ్ గతంలో స్పందిస్తూ.. “రుతురాజ్ మా దీర్ఘకాలిక కెప్టెన్” అని చాలాసార్లు స్పష్టం చేశారు. కాబట్టి, రుతురాజ్‌ను వదులుకోవడం దాదాపు అసాధ్యమేనన్న విశ్లేషణలు వస్తున్నాయి. మరి రుతురాజ్ కాకపోతే, అంత విలువైన ఆటగాడు CSKలో ఎవరున్నారు? అనేది మిలియన్ డాలర్ల ప్రశ్న.

సంజు కోసం రేసులో ఇతర జట్లు కూడా!
కేవలం CSK మాత్రమే కాదు, మరికొన్ని ఫ్రాంచైజీలు కూడా సంజు కోసం రాజస్థాన్ రాయల్స్‌ను సంప్రదించినట్లు సమాచారం. ఇటీవల లండన్‌లో జరిగిన RR రివ్యూ మీటింగ్‌లో, కోచ్ రాహుల్ ద్రావిడ్ సమక్షంలో ఈ ట్రేడ్ ప్రతిపాదనలపై చర్చ జరిగినట్లు తెలుస్తోంది.

ప్రస్తుతానికి ఈ ట్రేడ్ జరగడం కష్టం. రాజస్థాన్ రాయల్స్ వద్ద సంజుతో పాటు ధ్రువ్ జురేల్ రూపంలో మరో యువ వికెట్ కీపర్ ఉన్నప్పటికీ, సంజు లాంటి అనుభవజ్ఞుడైన కెప్టెన్‌ను వారు అంత సులభంగా వదులుకోరు. ఒకవేళ ఎవరైనా “నమ్మశక్యం కాని ఆఫర్” ఇస్తే తప్ప, రాజస్థాన్ ఈ ట్రేడ్‌కు ఒప్పుకోకపోవచ్చు.

CSK సంజుపై ఆసక్తి చూపడం నిజమే అయినా, ఈ ట్రేడ్ వాస్తవరూపం దాల్చడానికి చాలా అడ్డంకులు ఉన్నాయి. ఏదేమైనా, రాబోయే వారాల్లో ఐపీఎల్ ట్రేడింగ్ విండో మరింత ఆసక్తికరంగా మారనుంది. సంజు భవిష్యత్తు ఏంటో తెలియాలంటే మరికొంత కాలం వేచి చూడాల్సిందే.