మొదటి ప్రైవేట్ రైలు : తేజస్ ఎక్స్ ప్రెస్ ట్రయల్ రన్ ప్రారంభం

భారతదేశపు మొదటి ప్రైవేట్ రైలు తేజస్ ఎక్స్‌ప్రెస్ ట్రయల్ రన్ శుక్రవారం లక్నో జంక్షన్ నుంచి ప్రారంభమైంది. 110 కిలోమీటర్ల వేగంతో పనిచేసే తేజస్ ఎక్స్‌ప్రెస్‌ను ఐఆర్‌సిటిసి అధికారులు జెండా ఔపి ప్రారంభించారు. తేజస్ ఎక్స్‌ప్రెస్ ట్రయల్ రన్ చేయడంతో శుక్రవారం(సెప్టెంబర్-20,2019) ఐఆర్‌సిటిసి అధికారులు రైలు సమయం, వేగం, సౌకర్యం మరియు ఇతర వివరాలను గమనించారు. 

తేజస్ ఎక్స్‌ప్రెస్ టికెట్ బుకింగ్ శనివారం(సెప్టెంబర్ 21,2019)నుండి ప్రారంభమవుతుంది. అక్టోబర్ 4 న మొదటి రైడ్ ఉంటుంది. రైలు నంబర్ 82502 – తేజస్ ఎక్స్‌ప్రెస్ న్యూ ఢిల్లీ రైల్వే స్టేషన్ నుండి మధ్యాహ్నం 3.35 గంటలకు ప్రయాణం ప్రారంభించి గమ్యస్థానం లక్నో జంక్షన్ కు రాత్రి 10.05 గంటలకు చేరుకుంటుంది. అయితే లక్నో నుంచి ఢిల్లీ వెళ్లే తేజస్ ఎక్స్ ప్రెస్ 82501 షెడ్యూల్ టైమ్ ని IRCTC మార్చలేదు. లక్నోలో ఉదయం 6:10గంటలకు బయల్దేరి గమ్యస్థానం ఢిల్లీకి మధ్యాహ్నాం 12:25గంటలకు చేరుకుంటుంది.

తేజస్ ఫీచర్లు

మోషన్ సెన్సార్ డస్ట్‌బిన్‌ల నుండి ఆటోమేటెడ్ డోర్స్ వరకు, తేజాస్ ఎక్స్‌ప్రెస్‌ లో సాధారణ ఫ్లైట్ ఆఫర్‌లు అన్నీ వచ్చాయి. తేజాస్ ఎక్స్‌ప్రెస్‌లో ఒక ఎగ్జిక్యూటివ్ క్లాస్ ఏసీ చైర్ కార్ ఉంటుంది.ఇందులో 56 సీట్లు, 9ఏసీ చైర్ కార్లు ఉంటాయి, ప్రతి కోచ్‌లో 78 మంది ప్రయాణికుల సామర్థ్యం ఉంటుంది. తేజస్ ఎక్స్‌ప్రెస్ మొత్తం 758 మంది ప్రయాణికులను తీసుకెళ్లగలదు. ఇది న్యూ ఢిల్లీ మరియు లక్నో మధ్య ప్రయాణాన్ని 6 గంటల 15 నిమిషాల్లో ఘజియాబాద్, కాన్పూర్ సెంట్రల్ రెండు హాల్ట్ లతో కవర్ చేస్తుంది. తేజస్ ఎక్స్‌ప్రెస్ మంగళవారం మినహా వారంలో 6 రోజులు నడుస్తుంది.

తేజస్ టిక్కెట్ ధరలను ఐఆర్‌సిటిసి ఇంకా ప్రకటించలేదు. అయితే కాని ఢిల్లీ నుండి లక్నోకు వెళ్లే విమాన టికెట్ కంటే 50% తక్కువ ఖర్చు అవుతుందని మాత్రం తెలిపింది. తేజస్ ఎక్స్‌ప్రెస్‌లో సీటు బుక్ చేసుకోవడానికి, ప్రయాణీకులు తమ బెర్త్‌ను 60 రోజుల ముందుగానే రిజర్వు చేసుకోవచ్చు, అయితే సాధారణ రైళ్లకు వ్యవధి 120 రోజులు. ఈ రైలును అక్టోబర్ 4 న ఉత్తరప్రదేశ్ ముఖ్యమంత్రి అధికారికంగా జెండా ఊపి ప్రారంభిస్తారు.