ఆస్ట్రేలియా మహిళా క్రికెటర్లకు వేధింపులు.. ఇండోర్‌లో ఏం జరిగింది? నిందితుడు ఇతడే.. అరెస్ట్..
పోలీసులు తెలిపిన వివరాల ప్రకారం.. బైక్‌పై వచ్చిన ఆకిల్ ఖాన్ అనే వ్యక్తి ఇద్దరు మహిళా క్రికెటర్లను వెంబడించి, వారిలో ఒకరిని అనుచితంగా తాకాడు.
- Published By: Mahesh T ,Published On : October 25, 2025 / 03:49 PM IST
వరల్డ్ కప్‌లో ఆడేందుకు ఇండియాకు వచ్చిన ఆస్ట్రేలియా మహిళా క్రికెటర్లలో ఇద్దరికి చేదు అనుభవం ఎదురైంది. మధ్యప్రదేశ్ ఇండోర్‌లో ఇద్దరు ఆస్ట్రేలియా మహిళా క్రికెటర్లను ఒక వ్యక్తి బైక్‌పై వెంబడించి వేధించాడనే ఆరోపణలు వచ్చాయి. గురువారం జరిగిన ఈ ఘటన కలకలం రేపుతోంది.
పోలీసులు ఏం చెప్పారు?
పోలీసులు తెలిపిన వివరాల ప్రకారం.. బైక్‌పై వచ్చిన ఆకిల్ ఖాన్ అనే వ్యక్తి ఇద్దరు మహిళా క్రికెటర్లను వెంబడించి, వారిలో ఒకరిని అనుచితంగా తాకాడు. ఈ సంఘటన ఖజ్రానా రోడ్డులో ఉదయంపూట జరిగింది. ఆస్ట్రేలియా క్రికెటర్లు రాడిసన్ బ్లూ హోటల్ నుంచి ఒక కేఫ్‌కు నడుచుకుంటూ వెళ్తుండగా ఈ ఘటన జరిగిందని పోలీసులు చెప్పారు.
సబ్ ఇన్‌స్పెక్టర్ నిధి రఘువంశీ మీడియాకు వివరాలు తెలిపారు. ఇద్దరు మహిళా క్రికెటర్లు నడుచుకుంటూ వెళ్తుండగా.. బైక్‌పై వచ్చిన వ్యక్తి వారిని వెంబడించి, ఒకరిని తాకి అక్కడి నుంచి పారిపోయాడని అన్నారు.
ఈ ఘటన జరిగిన తర్వాత, ఆ ఇద్దరు క్రికెటర్లు తమ టీమ్ సెక్యూరిటీ ఆఫీసర్ డ్యానీ సిమ్మన్స్‌కు ఈ విషయం చెప్పారు. ఆయన వెంటనే పోలీసులను సంప్రదించారు. అసిస్టెంట్ కమిషనర్ ఆఫ్ పోలీస్ హిమాని మిశ్రా వచ్చి ఆ ఇద్దరు ఆటగాళ్ల వాంగ్మూలాలు తీసుకున్నారు. పోలీసులు పలు సెక్షన్ల కింద కేసు నమోదు చేశారు.
నిందితుడి అరెస్ట్
నిందితుడు ఆకిల్ ఖాన్
ఈ ఘటన జరిగిన సమయంలో అక్కడే ఉన్న ఒక వ్యక్తి నిందితుడి బైక్ నంబర్‌ను చూశాడు. ఆ నంబర్ ఆధారంగా పోలీసులు ఆకిల్ ఖాన్‌ను అరెస్ట్ చేశారు. “ఖాన్‌పై గతంలో కూడా కేసులు ఉన్నాయి, ప్రస్తుతం దర్యాప్తు కొనసాగుతోంది” అని అధికారి నిధి రఘువంశీ చెప్పారు. కాగా, అక్టోబర్ 25న (నేడు) ఆస్ట్రేలియా, సౌత్ ఆఫ్రికా మధ్య మ్యాచ్ జరుగుతోంది.
