అంతరిక్షంలో వ్యోమగాముల మెనూ

మనం రోజు తినే ఆహార పదార్ధాలతో సాధారణ మెనూ ఎలా ఉంటుంది ? చపాతీ/పుల్కా, వైట్ రైస్, పప్పు, కూర, చెట్నీ, రోటి పచ్చడి, సాంబారు, రసం, పెరుగు, అప్పడం, ఇంకో వెరైటీ ఏదైనా ఉంటుంది. అదే హోటల్ కి వెళ్ళామనుకోండి ఆ హోటల్ యొక్క స్థాయిని బట్టి అక్కడు బఫే లో 14, 15 ఐటెమ్స్ ఉంటాయి. మనమే ఇన్ని వెరైటీలతో ఇలా తింటుంటే మరి అంతరిక్షంలోకి వెళ్ళే వాళ్లకు ఎలాంటి ఫుడ్ తింటుంటారో ఓసారి చూద్దాం . 

1961లో మొదటిసారి అంతరిక్షంలో అడుగు పెట్టిన మొదటి వ్యక్తి రష్యాకి చెందిన యూరీ గగారిన్‌. స్పేస్‌కి వెళ్లిన తర్వాత అక్కడ  ఆయన ఏం తిన్నారు? ఎలా తిన్నారనే దానిపై అప్పట్లో ప్రజలకు తెగ ఆసక్తి ఉండేది. సాంకేతిక పరిజ్ఞానం ఇప్పుడున్నంత  స్థాయిలో అప్పుడు లేకపోవడంతో ఆరోజుల్లో శరీరానికి అవసరమయ్యే పోషక విలువలతో కూడిన ఆహారాన్ని ద్రవరూపంలోకి మార్చి ట్యూబ్స్‌లో నింపి అంతరిక్షంలోకి వెళ్లేవాళ్ళకు ఇచ్చేవారు. ద్రవరూపంలో ఉండే బీఫ్, లివర్‌ని గగారిన్‌ తిన్నారు. ఏవో ఒకట్రెండు పదార్థాలు మాత్రమే పంపేవారు. అదీ ట్యూబ్స్‌ నుంచి తీసుకువెళ్లడమే. అంతకు మించి ఏం తినాలన్నా ఉండేది కాదు. 

కానీ ఆ తర్వాత టెక్నాలజీ అభివృధ్ది చెందుతున్న క్రమంలో చాక్లెట్లు, సాస్‌లు కూడా వ్యోమగాముల మెనూలో చేరాయి. ఇప్పుడు 60 ఏళ్ల తర్వాత చేపడుతున్న గగన్‌యాన్‌ ప్రాజెక్టులో వ్యోమగాములకు సిద్ధం చేయబోయే మెనూ చూస్తే కళ్లు చెదురుతాయి. ఏకంగా 24 నుంచి 30 రకాల ఆహార పదార్థాల్ని పంపించడానికి సన్నాహాలు జరుగుతున్నాయి. వీటిని మైసూరులోని డిఫెన్స్‌ ఫుడ్‌ రీసెర్చ్‌ లేబొరేటరీ (డీఎఫ్‌ఆర్‌ఎల్‌) ఆహార పదార్థాలను సిద్ధం చేస్తోంది.

వీటిలో ఎక్కువగా శాకాహారమే ఉంది. వెజిటబుల్‌ రోల్స్, ఎగ్‌ రోల్స్, ఇడ్లీ, సాంబార్, కొబ్బరి పచ్చడి, పెసరపప్పు హల్వా, వెజిటబుల్‌ పులావ్‌ వంటివి మెనూలో ఉన్నాయి.  ఇవి నిల్వ ఉండేలా ప్యాకేజీ చేస్తారు. వీటితో పాటు హీటర్‌ కూడా ఉంటుంది. అంతరిక్ష కేంద్రంలో ఆహార పదార్థాలను వేడి చేసుకొని తినడమే. ఇక ఎక్కువ కారం తినేవారి కోసం అదనపు మసాలా సాచెట్స్‌ కూడా పంపించనున్నారు. మొత్తమ్మీద గత 60 ఏళ్లలో ఫంక్షన్లలోనే కాదు, అంతరిక్షంలో కూడా మెనూలో భారీగా మార్పులొచ్చేశాయి.