పార్లమెంట్‌లో గదులు మారిన టీడీపీ, వైసీపీ

పార్లమెంట్‌లో వైసీపీ పార్లమెంటరీ పార్టీకి నూతన కార్యాలయం కేటాయించింది కేంద్రం. లోక్‌సభ ఎన్నికల్లో వైసీపీ 22 మంది ఎంపీలను గెలుచుకున్న సంగతి తెలిసిందే. ఎంపీల విజ్ఞప్తి మేరకు లోక్‌సభ స్పీకర్‌ ఓం​ బిర్లా.. గ్రౌండ్ ఫ్లోర్లోని 5వ నెంబర్ గదిని ఆ పార్టీకి కేటాయించారు. అందులో 30 ఏళ్లుగా టీడీపీ కార్యాలయం కొనసాగుతోంది.

అయితే సరైన సంఖ్యలో సభ్యులు లేని కారణంగా ఎన్నికల్లో వైసీపీ 22 మంది ఎంపీలు గెలవడంతో ఆ కార్యాలయాన్ని వారికి కేటాయిస్తున్నట్లు స్పీకర్‌ వెల్లడించారు. మూడో అంతస్తులోని 118 నెంబర్ గదికి టీడీపీ కార్యాలయం తరలించారు. మూడు నెలల కిందటే అయిదో నెంబర్ గది కేటాయించినా ఖాళీ చేయలేదు. దీంతో ఈ వ్యవహారాన్ని పార్టీ నేత విజయసాయిరెడ్డి లేఖ ద్వారా స్పీకర్‌ దృష్టికి తీసుకెళ్లారు.

దీంతో బడ్జెట్‌ సమావేశాల సందర్భంగా.. మరోసారి ఓం​ బిర్లాను కలవడంతో లేఖపై స్పందించారు. ఆయన ఆదేశాలతో పార్లమెంట్‌ సిబ్బంది.. గ్రౌండ్ ఫ్లోర్లోని 5వ నెంబర్ గదికి టీడీపీ బోర్డును తొలగించి.. వైసీపీ కార్యాలయంగా మార్చారు. ఈ కార్యాలయానికి సమీపంలోనే ప్రధాని మోడీ (10వ నెంబర్ గది), హోం మంత్రి అమిత్‌ షా కార్యాలయాలు ఉన్నాయి.