BJP-Shiv Sena : అమీర్ ఖాన్-కిరణ్ రావు లాంటిదే బీజేపీ-శివసేన బంధం
బీజేపీ- శివసేన మధ్య సంబంధాలు బాలీవుడు నటుడు ఆమీర్ ఖాన్, కిరణ్ రావుల వంటివేనని శివసేన ఎంపీ సంజయ్ రౌత్ వ్యాఖ్యానించారు.
BJP-Shiv Sena బీజేపీ- శివసేన మధ్య సంబంధాలు బాలీవుడు నటుడు ఆమీర్ ఖాన్, కిరణ్ రావుల వంటివేనని శివసేన ఎంపీ సంజయ్ రౌత్ వ్యాఖ్యానించారు. తామేమీ భారత్-పాకిస్తాన్ లాంటి వాళ్లం కాదని.. తమ రెండు పార్టీల రాజకీయ పంథాలు వేరైనా తమ మధ్య స్నేహ భావం ఎప్పటికీ కొనసాగుతుందని చెప్పారు. అయితే శివసేన-బీజేపీ పార్టీలు శత్రువులు కాదని ఆదివారం మహారాష్ట్ర మాజీ సీఎం, బీజేపీ నేత దేవేంద్ర ఫడ్నవీస్ వ్యాఖ్యానించిన నేపథ్యంలో సంజయ్ రౌత్ ఈ విధంగా తనదైన రీతిలో స్పందించారు. ఇక, తాను బీజేపీ నేత ఆశిష్ షెలార్ తో ఈ నెల 3 న సమావేశమైనట్టు వచ్చిన వార్తలను సంజయ్ రౌత్ ఖండించారు. ఇవి కేవలం ఊహాగానాలేనని సృష్టం చేశారు.
కాగా,మహారాష్ట్రలో ప్రస్తుతం అధికారంలో ఉన్న శివసేన-ఎన్సీపీ-కాంగ్రెస్ కూటమి(మహా వికాస్ అఘాడి)కి బీటలు వారనున్నాయనే వార్తలు వినిపిస్తున్నాయి. మహా వికాస్ ఆఘాడీ ప్రభుత్వంపై ఒంటి కాలిపై లేచే మహారాష్ట్ర ప్రతిపక్ష నేత దేవేంద్ర ఫడ్నవీస్ ఉన్నట్టుండి స్వరం మార్చారు. బీజేపీ, శివసేనకు మధ్య శత్రుత్వం ఏమీ లేదని ఫడ్నవీస్ అన్నారు. తాజాగా శివసేన కీలక నేత సంజయ్ రౌత్ ఇలాంటి వ్యాఖ్యలే చేయడం ఇరుపార్టీలు కలిసి ప్రభుత్వాన్ని ఏర్పాటు చేస్తాయనే ఊహాగానాలను బలపరుస్తున్నాయి. ఫడ్నవీస్ ఇటీవల కేంద్ర మంత్రి అమిత్ షాను కలిసిన సమయంలో శివసేనతో పొత్తు పెట్టుకునేందుకు సన్నాహాలు ప్రారంభించాలని సూచించినట్లు మహా రాజకీయాల్లో చర్చ జరుగుతోంది. ఇటువంటి చర్చ జరుగుతున్న సమయంలో శివసేన-బీజేపీ నేతల ప్రకటనలు మహా రాజకీయాల్లో హాట్ టాపిక్ గా మారాయి.