సీఎం రేవంత్ సొంత నియోజకవర్గంలో బీజేపీ ఎలా గెలిచింది? హరీష్ రావు ఫైర్

కాంగ్రెస్ పార్టీలో ఉండి భారతీయ జనతా పార్టీ అజెండా అమలు చేస్తున్నది ఎవరు? నిండు సభలో మోదీని పెద్దన్న అని సంబోధించింది రేవంత్ రెడ్డి కాదా?

Harish Rao : సీఎం రేవంత్ రెడ్డి వ్యాఖ్యలపై ఫైర్ అయ్యారు మాజీ త్రి హరీశ్ రావు. పార్లమెంటు ఎన్నికల్లో బీఆర్ఎస్, బీజేపీ ఒక్కటయ్యాయని ముఖ్యమంత్రి రేవంత్ రెడ్డి ఢిల్లీలో ఆరోపించడం విడ్డూరం అన్నారు. మెదక్ లో బీజేపీని బీఆర్ఎస్ పార్టీయే గెలిపించిందని సీఎం స్థాయి వ్యక్తి గాలి మాటలు మాట్లాడటం సరికాదని హితవు పలికారు. మెదక్ పార్లమెంటు పరిధిలో 7 అసెంబ్లీ నియోజకవర్గాలుంటే అందులో 3 చోట్ల బీఆర్ఎస్ మెజారిటీ సాధించిందని తెలిపారు హరీశ్ రావు.

రఘునందన్ రావు సొంత నియోజకవర్గం దుబ్బాకలో కూడా బీఆర్ఎస్ మెజారిటీ సాధించిందన్నారు. రేవంత్ రెడ్డి సొంత గ్రామం కొండారెడ్డి పల్లిలో బీజేపీకి మెజారిటీ వచ్చిందని వెల్లడించారు. అంటే.. రేవంతే అక్కడ కాంగ్రెస్ ఓట్లు బీజేపీకి మళ్లించారా? అని ప్రశ్నించారు హరీశ్ రావు.

”రేవంత్ రెడ్డి సొంత నియోజకవర్గమైన మహబూబ్ నగర్ లో బీజేపీ ఎలా గెలిచింది? మహబూబ్ నగర్ పార్లమెంటు పరిధిలోని 7 అసెంబ్లీ నియోజకవర్గాల్లో కాంగ్రెస్ ఎమ్మెల్యేలున్నారు. వారంతా కలిసి బీజేపీని గెలిపించారా? కొడంగల్ లో రేవంత్ రెడ్డి 32వేల ఓట్ల మెజారిటీతో గెలిచారు. పార్లమెంటు ఎన్నికల్లో అక్కడ కాంగ్రెస్ అభ్యర్థికి 21 వేల మెజారిటీ మాత్రమే వచ్చింది. మిగతా ఓట్లను రేవంత్ రెడ్డి బీజేపీకి వేయించారా? రేవంత్ ప్రాతినిథ్యం వహించిన మల్కాజిగిరిలో భారీ మెజారిటీతో బీజేపీ ఎలా గెలిచింది? ఈ రెండు చోట్ల కాంగ్రెస్ పార్టీ బీజేపీని గెలిపించిందా?

బీజేపీ పంచన చేరింది, మోడీ శరణు చొచ్చింది రేవంత్ రెడ్డి. కాంగ్రెస్ పార్టీలో ఉండి భారతీయ జనతా పార్టీ అజెండా అమలు చేస్తున్నది ఎవరు? నిండు సభలో మోదీని పెద్దన్న అని సంబోధించింది రేవంత్ రెడ్డి కాదా? మోడీ, రేవంత్ కుమ్మక్కై సింగరేణిని ప్రైవేటుపరం చేస్తున్నారు. విభజన హామీలపై రేవంత్ రెడ్డి మోడీ ప్రభుత్వాన్ని గట్టిగా నిలదీయడం లేదు. రెండు జాతీయ పార్టీలు కలిసి ప్రాంతీయ శక్తి అయిన బీఆర్ఎస్ ను టార్గెట్ చేశాయి. బీజేపీ, బీఆర్ఎస్ ఒక్కటయ్యాయని రేవంత్ రెడ్డి చెప్పడం సిగ్గుచేటు” అని నిప్పులు చెరిగారు హరీశ్ రావు.

Also Read : నాది జగన్ తరహా పాలన కాదు: తెలంగాణ సీఎం రేవంత్ రెడ్డి హాట్ కామెంట్స్