అతడికి ఒంట్లోనే ఆల్కహాల్…తాగకుండానే కిక్కు
- Published By: venkaiahnaidu ,Published On : October 28, 2019 / 01:43 AM IST
సాధారణంగా ఎవరికైనా మద్యం తాగితే కిక్కు వస్తది అన్న విషయం తెలిసిందే. అయితే ఓ వ్యక్తికి మాత్రం మద్యం తాగకుండానే శరీరంలో ఆల్కహాల్ శాతం కలిగి ఉండి కిక్కును అనుభవిస్తున్నాడు. వినడానికి విచిత్రంగా ఉన్నా ఇది నిజం. మద్యం ప్రియులు బయటకెళ్లి ఆల్కహాల్ కొనకుండా ఇంట్లోనే ఆల్కహాల్ దొరికితే ఎంత బావుండునో అని కోరుకుంటారు. అలాంటిది ఏకంగా ఒంట్లోనే ఆల్కహాల్ ఉత్పత్తి అవుతుంది. అయితే ఇంకెంత బాగుండు అనుకుంటారు కదా! అతడెంత అదృష్టవంతుడోనని ఆశ్చర్యపోతారు. దీన్ని అనుభవిస్తున్న ఓ వ్యక్తి మాత్రం దీన్ని దురదృష్టకరమని భావిస్తున్నాడు.
న్యూయార్క్‌కు చెందిన ఓ వ్యక్తి డ్రైవింగ్‌ చేస్తుండగా ఆపి ఆల్కహాల్ స్థాయిని పరీక్షించారు. ఉండాల్సిన స్థాయి కంటే రెండు రెట్లు ఎక్కువగా ఉన్నట్లు తేలింది. అధికారులు అతన్ని అరెస్ట్‌ చేసి కోర్టులో నిలబెట్టారు. అయితే ఇలాంటి ఓ కేసు గురించి విన్న అతని బంధువు అతడికి సహాయం చేసింది.
ఆహారంలో ఉన్న పిండిపదార్థాలను గ్లూకోజ్‌గా కాకుండా, ఆల్కహాల్‌గా మార్చే ఓ ప్రత్యేక సూక్ష్మజీవి కడుపులో ఉండటంతో అతడికి ఈ పరిస్థితి ఎదురైంది. ఓ డాక్టర్‌ పర్యవేక్షణలో అతడిని ఉంచారు.
అధిక పిండిపదార్థాలు ఉన్న ఆహారాన్ని అతడు తీసుకున్నపుడు రక్తంలో ఆల్కహాల్ స్థాయి పెరగడాన్ని గుర్తించారు. పిండిపదార్థాలు అధికంగా లేని ఆహారాన్ని స్వీకరించినపుడే ఆల్కహాల్ స్థాయి లేదు. దీంతో అతన్ని కోర్టు మన్నించింది. ఈ అంతుచిక్కని వ్యాధి పరిశీలన దశలోనే ఉందని పరిశోధకులు బార్‌బరా కార్డెల్‌ అన్నారు. ఈ వ్యాధితో బాధపడుతున్నవారు ఆల్కహాల్ సేవించినట్లు కనిపిస్తారు. ఆల్కహాల్ వాసన వస్తున్నట్లు అనిపిస్తుంది. ఇది షుగర్‌ వ్యాధి ఉన్నవారిలో ఎక్కువగా కనిపిస్తుందని పరిశోధకులు చెబుతున్నారు. ఈ కేసు రిపోర్ట్ ను రిచ్ మండ్ యూనివర్శిటీ మెడికల్ జర్నల్ BMJ గ్యాస్ట్రోఎంటీరాలజీలో పబ్లిష్ చేసింది.
